СҚ Фармация чат боты арқылы тегін дәрі дәрмектердің мәртебесін қалай білуге болады

"СҚ-Фармация" бірыңғай дистрибьюторы Telegram мен WhatsApp желілерінде чат-ботты іске қосты. Оның көмегімен қазақстандықтар тегін дәрі-дәрмек мәртебесін тексеріп, препараттың қай жерде екенін біле алады, сондай-ақ жеңілдікпен берілетін дәрілер туралы басқа да ақпаратқа қол жеткізе алады. Tengri Health тілшісі жаңа қызмет қалай жұмыс істейтінін тексеріп көрді.

Жаңа чат-боттың мүмкіндіктері қандай?

Денсаулық сақтау министрлігінің мәліметінше, жаңа чат-бот пациенттерге тегін дәрі-дәрмекпен қамтамасыз ету туралы ақпаратты жедел алуға көмектеседі.

Оның көмегімен ЖСН немесе рецепт нөмірі бойынша дәрілерді іздеуге, қамтамасыз ету мәртебесін тексеруге және қажетті мәліметтерді алуға болады.

Қызметті іске қосу үшін пайдаланушы пәрмен беруі керек, яғни амандасуы қажет, содан кейін онлайн-ассистент бірден жауап береді. Ол өзін таныстырып, қалай көмектесе алатынын айтады және қарым-қатынас тілін таңдауды ұсынады.

Скриншот: Tengrinews.kz

Осыдан кейін әрекеттің бірнеше нұсқасы пайда болады:

ЖСН бойынша ақпарат іздеу; рецепт нөмірі бойынша іздеу; жеңілдікпен берілетін дәрілік заттар мен медициналық бұйымдар тізбесін қарау; байланыс ақпаратын алу. Дәрі-дәрмекті қалай тексеруге болады?

Біз ЖСН бойынша іздеудің қалай жұмыс істейтінін білуді жөн көрдік.

Осы бөлімді таңдағаннан кейін чат-бот жеке сәйкестендіру нөмірін енгізуді сұрайды және сұраныс өңдеуге қабылданғанын хабарлайды. Бірнеше секундтан кейін жауап келеді.

Скриншот: Tengrinews.kz

Біздің жағдайда мынадай хабарлама келді, себебі кейінгі алты айда пациент дәрігерге қаралмаған және оған расында рецепт жазылмаған.

Егер пациентке тегін дәрілік препараттар тағайындалған болса, чат-бот дәрі-дәрмекпен қамтамасыз ету туралы өзекті ақпаратты көрсетеді. Хабарламада пациенттің аты-жөні, медициналық ұйым, диагноз, сондай-ақ кейінгі алты айда тағайындалған препараттар тізімі көрсетіледі.

Содан кейін бот толығырақ ақпарат қажет болатын дәріні таңдауды ұсынады. Ол үшін тізімдегі препарат белгіленген санды жіберу қажет.

Сервис дәрінің атауын, оның халықаралық патенттелмеген атауын көрсетеді, сондай-ақ медициналық ұйымда препараттың қандай мөлшерде бар екенін хабарлайды.

Денсаулық сақтау министрлігі баспасөз қызметінің бейнежазбасынан скриншот

Басқа дәріні тексеру қажет болса, диалогты қайта бастап, сол әрекеттерді қайталау жеткілікті.

Тағы нені білуге болады?

Тағайындалған препараттар туралы ақпараттан бөлек, чат-бот арқылы мыналармен танысуға болады:

бірыңғай дистрибьютор сатып алатын жеңілдікпен берілетін дәрілік заттар мен медициналық бұйымдар тізбесімен; тегін немесе жеңілдікті шарттармен берілетін дәрілік заттар мен медициналық бұйымдар тізбесімен.

Скриншот: Tengrinews.kz

Сонымен қатар сервис арқылы "СҚ-Фармация" ЖШС байланыс мәліметтерін білуге және медициналық терминдер бойынша анықтамалық ақпарат алуға болады.

Еске сала кетейік, жыл басынан бері "СҚ-Фармацияның" байланыс орталығына 15 мыңнан астам қоңырау түскен. Хабарласқандардың басым бөлігі - диабеті және онкологиялық аурулары бар пациенттер.

Google News арқылы жаңалықтарымызды қадағалаңыз

Жазылу

Дәрі-дәрмек

СҚ-Фармация

Денсаулық

науқастар