СҚО ға Ресейден 184 бас асылтұқымды ірі қара әкелінді

Солтүстік Қазақстан облысына Ресейден 184 бас асылтұқымды ірі қара әкелінді.

Трудовое ауылындағы кәсіпкер мемлекеттік бағдарлама бойынша 500 млн теңге несие рәсімдеп, сүтті бағыттағы мал шаруашылығын дамытуды жоспарлап отыр.

Бұл сиырлар Ресейдің Пермь қаласынан Қазақстанға осындай арнайы көліктермен бір жарым тәуліктің ішінде келіп жетті. Енді олар 21 күнге карантинге жабылып, ветеринарлармен 13 түрлі ауруға тексерілетін болады.

Жеті жүк көлігіне 184 құнажын тиелген. Бұл - қара ала голштин тұқымы. Мамандардың айтуынша, бір сиыр тәулігіне 30-32 литр сүт береді. Кәсіпкер Яков Леонов енді егінмен қатар мал шаруашылығын дамытпақ. Мемлекеттік бағдарлама бойынша 500 млн теңге алып, асылтұқымды ірі қара сатып әкелді.

Яков Леонов, кәсіпкер:

- Несие «Солтүстік» әлеуметтік-кәсіпкерлік коорпорациясы арқылы 2,5 пайызбен 10 жылға рәсімделді. Бұл ең тиімді шарт. Оның үстіне екі жыл каникул беріледі. Құнажындардың жағдайы өте жақсы. Мал шаруашылығынан жыл бойы пайда түседі. Сондықтан мемлекеттің қолдауын мейлінше пайдаланып, келер жылы тағы 400 бас әкелуді жоспарлап отырмыз.

Кәсіпкер әр құнажынның басына мемлекеттен қосымша 400 мың теңге субсидия алады. Мал шаруашылығы Трудовое ауылының тұрғындарын жыл бойы тұрақты табыспен қамтуға мүмкіндік береді. Енді фермада 60-қа жуық жаңа жұмыс орны ашылады. Серіктестікте заманауи сауын кешені бар.

Филипп Закаревичус, мал шаруашылығының бригадирі:

- Мал шаруашылығын одан әрі дамытып, ірі қараны 1 200 басқа дейін көбейтуді жоспарлап отырмыз. Жыл басында әкелінген құнажындар жергілікті климатқа тез бейімделіп, аман-есен бұзаулады. Бұл тұқымның сүті өнімді әрі сапалы болады.

Солтүстік Қазақстан облысында мал шаруашылығы өркендеп келеді. Былтыр алыс-жақын елдерден үш жарым мыңға жуық асылтұқымды ірі қара сатып алынды. «Бұл қайта өңдеу кәсіпорындарын сапалы шикізатпен қамтуға мүмкіндік береді», - дейді мамандар.

Авторлары: Айдарбек Айтмұхамбетұлы, Төлеген Иманов, Қуаныш Қазбеков