СҚО ға Германиядан 165 бас асыл тұқымды ірі қара әкелінді

Солтүстік Қазақстан облысына Германиядан 165 бас асыл тұқымды ірі қара әкелінді.

Ғабит Мүсірепов ауданына қарасты Бу-дённое ауылында заманауи тауарлы-сүт фермасы салынды. Кәсіпкер мемлекеттік бағдарлама бойынша, төмен пайыздық несие алып, жылына 10 мың тонна өнім өндіруді жоспарлап отыр. 

Бұл құнажындар Германиядан Қарағандыға ұшақпен, одан әрі жүк көліктерімен Солтүстік Қазақстан облысының Будённое ауылына жеткізілді. Енді олар карантинге қамалып, ветеринарларлық бақылауда болады. Қараала голштин тұқымының алғашқы 165 басы жергілікті ауа райына жатырқай қойған жоқ.

Олег Колодько, тауарлы-сүт фермасының жетекшісі:

- Бұл сиырлар мол өнім береді. Әрқайсынан орташа есеппен 40 литр сүт сауылады. Шикізат қайта өңдеу зауыттарына тапсырылады. Серіктестер қазірдің өзінде хабарласып жатыр. Сондықтан сату бойынша мәселе болмайды. 

Елді мекенде оларға арналған заманауи тауарлы-сүт фермасы салынды. Жоба құны – 10 млрд теңге. Кешен жасанды интеллект негізінде жұмыс істейді. Басқару, сиырларды сауу, күнделікті жай-күйін қарау және жем-шөбін дайындау жүйесі толық цифрландырылған. Өңірде осындай 60-қа жуық кәсіпорын бар.

Талғат Наурызбаев, ауыл шаруашылығы басқармасы басшысының орынбасары:

- «Солтүстік Қазақстан облысының тәжірибесін тарату» бағдарламасы бойынша бізге 2023-2024 жылдары 23 млрд теңге ақша бөлінген. Соған біз 23 жобаны сүт өндіру фермаларын кіргіздік. Соңғы үш жылдың ішінде біздің сүт өндіруіміз осы сүт фермаларында 15 пайызға өсті. 

Жаңадан ашылған тауарлы-сүт фермасы 1200 басқа арналған. Кәсіпкерге әр бас мал үшін мемлекет тарапынан 700 мың теңге субсидия төленеді.

«Ең бастысы, осындай жобалар ауыл-аймақтардың әлеуметтік-экономикалық дамуына тың серпін береді», - дейді мамандар. 

Айдарбек Айтмұхамбетұлы, Қуаныш Қазбеков