СҚО кәсіпкерлеріне 4 трлн теңгеге жуық шығынды жабу міндеттелді

Тергеу мәліметтері бойынша, Обуховский кен байыту комбинатында (КБК) титан-цирконий кенін өндірумен және өңдеумен айналысқан әкелі-балалы Долгалоевтар қойнауынан 917 мың тоннадан астам пайдалы қазбаларды заңсыз өндірген.

2021 жылы Индустрия және инфрақұрылымдық даму министрлігі «Тиолайн» ЖШС-мен жер қойнауын пайдалануға уағдаластықтарды тоқтату туралы шешім қабылдаған. Оның ізін ала сот процестері басталған. Алайда сот ісі жүріп жатқан кезеңдерде КБК-да кен өндіру тоқтатылмаған. Нәтижесінде 2021-2024 жылдар аралығында қазып алынған пайдалы қазбалар қылмыстық істің мәніне айналған. Айыптау актісінде «Обуховское» кен орнының жер қойнауын заңсыз пайдалану салдарынан 10.04.2021 жылдан 15.04.2024 жылға дейінгі кезеңде экономикалық залал 3 988 514 249 738, 12 теңге болғаны көрсетілген.

Қылмыстық іс алғаш рет Солтүстік Қазақстан облысында алқабилердің қатысуымен қаралып, 2024 жылдың желтоқсанында ақтау үкімі шығарылған. Кейін апелляциялық алқа әлгі үкімнің күшін жойып, қайта қарауға жібереді. Бірақ қылмыстық іс бұл жолы Павлодарға жөнелтіледі.

Павлодар облысының қылмыстық істер жөніндегі мамандандырылған ауданаралық сотында алқабилердің қатысуымен сот талқылауы 8 айға созылып, үкім тек бүгін шығарылды. Сотта барлық айыпталушы кінәлі деп танылды. Виктор Долгалевке 11 жыл бас бостандығынан айыру жазасы тағайындалды. Ал оның ұлы Данил Долгалев рақымшылықты ескере отырып, 4 жыл 9 ай бас бостандығынан айрылды.

Бұған қоса, аталған қылмыстық іс бойынша жәбірленуші деп танылған СҚО Тайынша ауданының әкімдігі мен Өнеркәсіп және құрылыс министрлігінің 4 триллион теңгеге жуық талап арызы толық көлемде қанағаттандырылды.

Сотта тағы екеуі сотталушы — адвокат және делдалдың ісі де қараусыз қалған жоқ. Олар пара берді және алаяқтық жасады деп айыпталды. Сот олардың әрқайсысына 10 жылға бас бостандығынан айыру жазасын тағайындады.

Еске сала кетейік, бұған дейін Павлодар облысында 291 млн теңгені қолды қылған шенеунік пен кәсіпкер 7 жылға сотталды.