Тайландқа ұшасыз ба? 16 қазаннан бастап әуежайларда жаңа ережелер күшіне енеді

16 қазаннан бастап Таиланд әуежайларындағы қауіпсіздік қызметінің қызметкерлері тексеру кезінде күдікті заттар немесе ықтимал қауіп анықталған жағдайда, тіркелген жүкті жолаушының қатысуынсыз аша алады. Бұл ретте тексеру құжатталуы тиіс, ал процедурадан кейін жолаушыға чемоданның ашылғаны туралы хабарлануы керек деп хабарлайды Tengri Travel The Thaiger басылымына сілтеме жасап.

Таиланд әуежайларында не өзгереді?

2026 жылғы 11 қазанда Таиландтың Азаматтық авиация басқармасы (CAAT) тіркелген жүкті тексерудің жаңа тәртібі туралы ақпарат жариялады.

Егер қауіпсіздік қызметкерлерінде күдік туындаса немесе авиациялық қауіпсіздікке қатер төндіруі мүмкін заттарды анықтаса, иесіне алдын ала ескертпестен және оның келуін күтпестен чемоданды ашуға рұқсат беріледі.

CAAT тексерулер белгіленген рәсімдер бойынша жүргізілуі тиіс екенін, ал олардың ауқымы қауіп деңгейіне сәйкес келуі керек екенін атап өтті.

Қандай жағдайларда чемоданды ашуы мүмкін?

CAAT ұсынымдарына сәйкес, қауіпсіздік қызметкерлері күдікті заттарды немесе авиациялық қауіпсіздікке төнуі мүмкін қатерді анықтаған жағдайда, жолаушыға алдын ала ескертпестен тіркелген жүкті аша алады.

Бұл ретте процедура міндетті түрде тексеруді тіркеумен қатар жүруі керек. Чемоданның ішіне оны ашу себептері түсіндірілген хабарлама салынуы тиіс.

Тексерулер арнайы бөлінген орындарда жүргізілуі керек. Сондай-ақ билік өкілдері қажет болған жағдайда тексеруді кім жүргізгенін және нақты не табылғанын анықтау үшін фотосуреттер мен басқа да дәлелдемелерді сақтауды талап етеді.

Процедура аяқталғаннан кейін жолаушыға жүктің ашылғаны туралы хабарлануы тиіс.

CAAT жаңа тәртіп әуежайлардағы кідірістерді азайтуға бағытталғанын түсіндірді: қызметкерлерге енді күдікті чемоданды ашпас бұрын жолаушыны іздеп, оның келуін күтудің қажеті болмайды.

Жүктен заттар жоғалса немесе чемодан зақымдалса не істеу керек?

Егер ұшудан кейін жолаушы жеке заттарының жоғалғанын, чемоданның зақымдалғанын байқаса немесе заңсыз тексеру жүргізілді деп күдіктенсе, ол оқиғаның мән-жайын тексеру туралы өтінішпен әуежай әкімшілігіне жүгіне алады.

Сондай-ақ әуекомпания арқылы шағым түсіруге немесе Таиландтың Азаматтық авиация басқармасының онлайн өтінім беру жүйесін пайдалануға болады.

Өтініш беру кезінде отырғызу талонын, жүк түбіртегін, зақымдану суреттерін және шағымды қарау кезінде көмектесетін басқа да дәлелдерді сақтау ұсынылады.

Жүкті ұшуға қалай дайындау керек?

Жүктің зақымдану қаупін азайту және құнды заттарды қорғау үшін CAAT келесі қарапайым ережелерді сақтауды ұсынады:

TSA жүйесімен үйлесімді құлыпты пайдаланыңыз. Мұндай құлыпты тексеру қажет болған жағдайда құлыптау механизмін зақымдамай-ақ арнайы кілтпен немесе құралмен ашуға болады. Бұл міндетті талап емес, ұсыныс; Құнды заттарды қол жүгімен тасымалдаңыз. Ақша, зергерлік бұйымдар, төлқұжаттар мен маңызды құжаттарды жүкке өткізбеген дұрыс; Тасымалдау ережелерін тексеріңіз. Сапарға шығар алдында әуекомпания мен баратын ел белгілеген тыйым салынған заттар мен қауіпті жүктердің тізімімен танысыңыз; Чемоданды өткізбес бұрын суретке түсіріп алыңыз. Суреттер ұшудан кейін зақымданулар анықталса, оның бастапқы күйін растауға көмектеседі. Жүк түбіртегін сақтаңыз. Ол әуекомпанияға немесе әуежайға жүгінген кезде қажет болуы мүмкін.

Еске салсақ, Таиландтың Азаматтық авиация басқармасы бұл ереже туралы алғаш рет тамыз айында хабарлаған болатын. Ол кезде Таиландтың Туризм басқармасы (TAT) өз кезегінде жолаушыларға 16 қазаннан кейін ел әуежайларынан тіркелген жүкпен ұшатын болса, өзекті талаптарды әуекомпаниядан, ұшу әуежайынан және CAAT-тан алдын ала нақтылауды ұсынған еді.

Тағы оқыңыз: Таиланд туристер үшін алым енгізбек: сомасы аталды

Бізді Google-дың негізгі дереккөздер тізіміне қосыңыз

Қосу