Тайвань азаматтарға 314 доллардан ЖИ дивидендтерін төлейді

Тайвань азаматтарына жасанды интеллектінің (ЖИ) дамуынан түскен дивиденд ретінде 314 доллардан төленеді, деп хабарлайды Tengrinews.kz тілшісі Taipei Times басылымына сілтеме жасап.

Тайвань президенті Лай Циндэ келесі жылы әрбір азаматқа 10 мың жаңа тайвань долларын (шамамен 314 АҚШ доллары) төлеу жоспарын жариялады. Бұл шешім Тайвань экономикасының жоғары өсу қарқынымен байланысты, ол негізінен ЖИ саласының дамуы есебінен қамтамасыз етіліп отыр.

Лай Циндэ бұл төлем барлық азаматқа жасанды интеллектінің дамуынан түскен дивидендтерді бөлісуге мүмкіндік беретінін мәлімдеді.

2026 жылдың қаңтар - маусым айларында Тайваньның ІЖӨ-сі 14,15 пайызға өсті. Президент бұл нәтижені кейінгі 50 жылдағы жылдың бірінші жартыжылдығы үшін ең үздік көрсеткіш деп атады. 2026 жылдың қорытындысы бойынша экономикалық өсім болжамы да 9,64 пайыздан 11,05 пайызға дейін көтерілді. Егер болжам орындалса, бұл көрсеткіш соңғы 39 жылдағы ең жоғары мәнге ие болады.

Лай өсімнің негізгі факторлары ретінде жартылай өткізгіштер өнеркәсібін, ақпараттық-коммуникациялық технологиялар саласын және өндірістік тізбектерді атап өтті. ЖИ, жоғары өнімді есептеулер мен бұлтты технологиялар саласындағы шешімдерге әлемдік сұраныстың артуы маңызды рөл атқарды.

Тайваньның орталық бюджетінің 2027 жылғы күтілетін кірісі 3,9266 триллион жаңа тайвань долларын құрайды. Лай Циндэнің сөзінше, Тайвань билігі осылайша экономикалық өсімнің пайдасын тек технологиялық сектор ғана емес, қарапайым отбасылар да көруін қамтамасыз етпек.

Анықтама: Қытай Тайваньды өзінің бүлікші провинциясы деп санайды және арал мен басқа мемлекеттер арасындағы кез келген ресми байланыстарды үзілді-кесілді жоққа шығарады. Бейжің Тайваньмен кез келген байланысты өз егемендігі мен аумақтық тұтастығына нұқсан келтіру деп бағалайды. Қазақстан да "бір Қытай" принципін қолдайды және Тайваньды ҚХР аумағының ажырамас бөлігі деп санайды.

Google News арқылы жаңалықтарымызды қадағалаңыз