Тайвань тұрғындарының материктік Қытайға кіруі жеңілдейді

Бұл туралы сәрсенбі күні ҚХР Мемлекеттік кеңесі жанындағы Тайвань істері жөніндегі кеңсе өкілі Чэнь Биньхуа мәлімдеді. Оның айтуынша, енді Тайвань тұрғындары қажетті талаптарға сай келетін барлық бақылау-өткізу бекеттерінде кіретін құжаттарды рәсімдей алады.

Кезекті баспасөз мәслихатында сөйлеген Чэнь Биньхуа бұл қадам Қытайдың ашықтығын одан әрі кеңейтуге және тайваньдық қандастардың сапарын ыңғайлы әрі қауіпсіз етуге бағытталғанын атап өтті.

Жаңа жоспарға сәйкес, Тайвань тұрғындары материкке келген кезде, шығу пунктіне қарамастан — тікелей Тайваньнан, сондай-ақ Сянган (Гонконг), Аомэнь (Макао) немесе басқа елдер арқылы келсе де — кез келген қажетті талаптарға сай келетін бақылау-өткізу бекеттерінде бір реттік кіру рұқсатын рәсімдей алады. Өкілдің айтуынша, бұл жаңашылдыққа қатысты нақты мәліметтер мен бақылау бекеттерінің тізімі тиісті мекемелер тарапынан жақын арада жарияланатын болады.

Чэнь Биньхуа атап өткендей, жаңа ереже Тайвань бұғазының екі жағындағы алмасу мен ынтымақтастықты жеңілдетіп, бейбіт және ықпалдасқан даму үдерісіне септігін тигізеді.

Бұған дейін Қытайдың ірі телекоммуникациялық компаниялары бүкіл ел бойынша электронды SIM-карта (eSIM) қызметін ұсынуға рұқсат алғанын жазған едік.