Талдықорғанда жастар Ауған соғысы ардагерімен жүздесті

Адал еңбек ет, әскери борышыңды абыроймен атқар! Талдықорған жастарымен жүздескен ауған соғысының ардагері Өмірсерік Өмірәліұлы осылай деп білімгерлерге ағалық ақылын айтты. Жас буынға ғұмыр жолын да баяндап берді. 1979-1980 жылдары интернационалистік борышын өтеген майдангер ұзақ жылдар бойы ауыл шаруашылығы және энергетика саласында еңбек етті. Бүгінде алпыстың асқарына шықса да қол қусырып отырған жоқ. Емен-жарқын сұхбат барысында жастарды білім алу жолында талмай ізденіп, ел үшін аянбай қызмет етуге үндеді.  

Ақерке Досымханқызы, қала тұрғыны: 

- Бүгінгі кездесуден түйген ойым, өзіме шығарған қорытындым,  әрдайым еңбекке адал болу, адал азамат болу. Біздің еңбекке деген құлшынысымызды арттыру үшін осындай кездесулер үлкен үлесін қосады деген ойдамын. 

Өмірсерік Өмірәліұлы, Ауған соғысының ардагері:

-Ең бастысы, тәртіпті болу керек. Спортқа жақын болу керек. Жалқау болмай, білімді болу керек. Өзіміздің көрген, білгенімізді айтып бердік. Көк туымыз аспанда желбірей берсін деп тілейміз. Еліміз аман, жұртымыз тыныш болсын! Жақсылық заман болсын деп тілеймін.