Талдықорғандық студенттер жүгерінің жаңа тұқымын шығарды

Дақыл түрлі түсті болуымен және азықтық құнарымен ерекшеленеді. Жас зерттеушілер ғылыми жұмыстары арқылы еліміздегі байқауларда топ жарып, әлемдік додаға да қатысты. 

Асқар Рахым және Тимур Бүркітбай есімді жас зерттеушілер мексикалық және отандық жүгеріні селекциялау арқылы жаңа тұқым шығарды. Қазір олар аталған дақылды оқу орнының жылыжайына егіп, көбейтуге тырысып жатыр.

Асқар Рахым, жас зерттеуші:

- Әкімдік әзірше бір гектар жер береміз деді. Осы тұқымдар дайын болған кезде сол жерге егеміз. Осының арқасында сорт шығаруымыз бірнеше есе тез жүретін болады.

Студенттер жобаны түрлі көрмелерде көпшілік назарына ұсынып, ғылыми байқауларда да бақ сынады.

Тимур Бүркітбай, жас зерттеуші:

- Біздің жобамыз «Еnactus Kazakhstan national» конкурсында бірінші орынға ие болды. Соның нәтижесінде  «World cup» жобасына қатысып, 36 мемлекеттің ішінен жартылай финалға дейін жеттік. Ал өз университетімізде «Жас ғалым» грантын жеңіп алдық.

Ерік Бейсенбеков, жоба жетекшісі:

- Жобаның маңыздылығы қант өндіруге, ауыл шаруашылығын дамытуға және крахмалды төрт есе артық өндіруге бағытталған жобалардың бірі болып табылады. Келешекте осы әлемдік университетімен Италия политех университетімен осы жобаларды дамыту жоспарда бар.

Жастардың тағы бір бастамасы бар. Ол құс шаруашылығына қатысты. Білімгерлер құстарды будандастырумен де айналысады. Сегіз жылдың ішінде олар жергілікті климатқа бейімделген түрлі түст  жұмыртқа туатын тауықтың жаңа тұқымын шығардық деп отыр.

Бұл идеяның авторы Асқар Рахым. Ол үй құстарын будандастыруды оқушы кезінде бастаған. Содан бері қара тауықтарды өсіріп, көрсеткіштерін саралап жүр.

Асқар Рахым, жас зерттеуші:

- Бұл тауықтың атауы «Kazaukana». Казаукана тауығы жылына 300 жұмыртқа тууда. Алты айдан бастап жұмыртқа туады да 2,5 келіге дейін барады. Әтештер үш келіге дейін барады. Тағы бір ерекшелігі бұлардың еттері қара болады. Қою қызғылт түсті. Фиброменот процесінің арқасында протейн, нәруыз, темір цинк көп жиналады. Кәдімгі тауықтардың етінен қарағанда құндылығы жоғары.

Жас зерттеушілер енді өз жобаларын патенттеуге кіріспек. Сол арқылы жүгері мен тауықтың жаңа тұқымын тіркетуді мақсат етіп отыр.

Авторлары: Шыңғыс Қалиден, Қуаныш Түргенбаев, Айгүл Ғазизулина