Тараздағы каналдар қоқысқа толған

Тараздағы су арналары тұрмыстық қалдыққа толып жатыр. Солардың бірі - ұзындығы 1,2 шақырымдық Қарасу каналы.

4 бірдей шағын ауданның ортасындағы алып су арнасын қамыс басып, қоқыс толған. Бұл уақытылы тазалықтың болмауынан қалыптасқан жағдай дейді, - тұрғындар. Сонымен қоса жұрт шағын аудандағы қоқыс контейнерлері уақытылы тазаланбағандықтан тез толып қалатынына наразы. Бұл Қарасу каналының Самал шағын ауданындағы бөлігі. Арнаның іші қамыс пен пластик бөтелкеге толған. Канал ішінен киім-кешек пен жол сөмкесін де байқауға болады. Бұл тазалыққа жауапты мекеменің салғырттығы дейді, - тұрғындар.

Былтыр Таразға көршілес екі ауданнан елді мекендер мен шағын аудандар қосылды. Соның есебінен қала аумағы кеңейді. Шаһар орталығы таза болғанымен, сол шеткері шағын аудандар шашылып, қалдықтар үйіліп жатыр, - дейді тұрғындар. Олардың сөзін тазалыққа жауапты мекеменің басшысы да растап отыр. Мәселені шешу үшін биыл қосымша қызметкерлер алып, жұмысшылар санын 1 мыңнан асырмақ.

Ғалымжан Қайназаров, «Жасыл ел – Тараз» ЖШС директоры:

- Жаңа көшелер қосылды. Мысалы, қалада 7 үлкен парк, 62 сквер және 120 көше бар. Соның бәрін таза ұстауға адам қажет болып жатыр. Ол жұмысшылардың барлығын біздің штатқа алдық. 300 адамдай болады. Қаламызда екі аудан бар, сол 300 адамды 100 адамнан бөліп-бөліп береміз. Сол жұмысшылар қала сыртындағы жұмыстарды атқарады.

Қала тазалығын сақтауға тәртіп сақшылары да атсалысып жатыр. Былтыр 1025 аула камерасы арқылы, қоқыс тастаған 27 мыңнан аса адамды жауапкершілікке тартқан. Салынған айыппұлдың көлемі 270 млн теңге.

Нұржан Керебаев, облыстық ПД Қоғамдық қауіпсіздік басқармасы басшысының орынбасары:

- Учаскелік полиция инспекторлары және де патрульдік полиция қызметкерлерімен учаскелерді аралау кезінде осындай фактілер анықталуда. Тұрғындарымыз қоқысты рұқсат етілмеген жерге тастағаны тіркелуде. Ол бойынша әкімшілік коддекстің 505-бабы бойынша хаттамалар толтырылып, 20 АЕК айыппұл салып жатыр. Түсіндірме жұмыстар жүргізу үшін күнделікті учаскелік инспектор тұрғындармен кездесу өткізіп жатыр.

Жалпы «Жасыл ел - Тараз» мекемесінде 132 техника бар. Дегенмен оның 35-сі ескіріп істен шыққан. Қалғанының да қызмет еткеніне 10-15 жылдан асқан. Сондықтан мекеме биыл 81 техниканы лизингке алмақ. Қала тазалығына тұрғындардың да бей-жай қарамауы үшін  2024 жылы елде  TazaQazBot чат-бот іске қосылды. Алайда, Тараздағы тұрғындардың басым бөлігі цифрлық сервистен бейхабар екенін айтты. Яғни жергілікті атқарушы органдар тарапынан телграмм чат-бот халыққа аз насихатталған. Сәйкесінше тұрғындар үйілген қоқысты көре тұра тиісті органдарға шағымдану тәсілін білмейді.

Авторлары: Мерей Бает, Бақытжан Бапаев, Елдар Байділдә