Көкшетаулық тұрғындар уақытында шығарылмайтын қоқысқа шағымданды

Көкшетауда қоқыс уақытында шығарылмайды. Тұрғындар осылай деп шағымданып жатыр. Олардың айтуына қарағанда көпқабатты үйлердің ауласындағы қоқыс контейнерлері тез толып қалады. 

Тұрмыстық қалдықтар уақытында тазаланбаған соң, тау болып үйіліп жатады. 

Экобелсенді Әнуар Қапез үйілген қоқыс көрсе осылай суретке түсіріп алады. Үш жылдан бері осы іспен айналысады. Фотосуретті бірден жауаптыларға жібереді. Айтуынша, көп жерде контейнер тазаланады, бірақ айналасы шашылып жатады. Әнуар коммуналдық мекеменің қызметі көңіл көншітпейді деп отыр.

Әнуар Қапез, қала тұрғыны:

- Неге 3-ке бағалаймын, өйткені бізде қоқыс жәшіктері жетпейді. Сосын техника да кішкене жетпейді. Сосын акциялар өткізу керек. Полициямен бірге жұмыс істеу керек. Сол себептен мен үшке бағалаймын.

Ол экологиялық мәселелер туралы сұрағын құзырлы органдарға түрлі қосымшалар арқылы да жолдайды. Өтінім жібергеннен кейін кері байланыс күтеді. «Жауаптылар атқарылған жұмыс жөнінде есеп береді» - дейді.

Өңірде былтыр «Таза Қазақстан» республикалық акциясы аясында іске қосылған Tekegram ботқа 392 арыз-шағым түскен. Соның 365-іне катысты мәселе шешімін тапты. Биліктегілердің айтуынша, соңғы жылдары облыс орталығында халық саны бірнеше есе өскен. Бүгінде ресми тіркелген 200 мыңға жуық адам бар. Адам көбейіп, жаңа үйлер салынғаннан кейін, коммуналдық мекеменің де жүктемесі артқан.  

Ерболат Серікбаев, қалалық ТҮКШ бөлімінің басшысы:

- Қаладағы жаңа шағын аудандар да кей кездері тұрмыстық қалдықтар жиналып қалып жатады. Біз ол мәселені білеміз. Жалпы қазір шаһардағы қоқыс шығару жұмыстарына төрт кәсіпорын жауапты. Алдағы уақытта мәселені түбегейлі шешу үшін техникалар санын арттырып, қосымша қоқыс жәшіктерін орнатуды көздеп отырмыз.

Бағдарлама әлеуметтік жарнама ретінде әлі де кеңінен насихатталуы тиіс. Өйткені тұрғындардың басым бөлігі бұл бастама туралы толық хабардар емес. Сондай-ақ жергілікті атқарушы органдар мен экологиялық белсенділер тарапынан чат-ботты ілгерілету жұмыстары жеткіліксіз жүргізілуде. Соның салдарынан қоршаған ортаның ластану деректері анықталған күннің өзінде тұрғындар тарапынан өтініштер сирек тіркеліп отыр.

Авторлары: Абзал Азаматұлы, Виктор Полянный