Таудан өз бетімен түсе алмады ТЖМ қызметкерлері қазақстандық әйелді құтқарды

Алматыда құтқарушылар әйелге таудан түсуге көмектесті. Төтенше жағдайлар министрлігі қазақстандықтарды тауға шығар алдында дайындалып, тек тексерілген әрі қауіпсіз бағыттарды таңдауға шақырады, - деп хабарлайды Tengri Travel.

Баспасөз қызметінің мәліметінше, "112" пультіне Медеу ауданындағы "Тұйықсу" альплагерінен жоғары жерде 1988 жылы туған қазақстандықтың таудан өз бетінше түсе алмай жатқаны туралы хабарлама түскен.

"Іздестіру-құтқару жұмыстарын жүргізу үшін оқиға орнына Алматы қаласы ТЖД құтқару қызметі жіберілді. Бұл жерге жеткен соң олар әйелді тауып, қауіпсіз жерге эвакуациялады", - деп хабарлады құтқарушылар.

Оның медициналық көмекке мұқтаж болмағаны нақтыланды.

ТЖД мәліметінше, Алматы облысының тауы мен іргелес аумақтарында алғашқы көмек қобдишалары, қуаттау станциялары, жылы көрпелер мен азық-түлік қоры бар 18 тау лашығы жабдықталған. Сондай-ақ, төрт бақылау-құтқару пункті жұмыс істейді, оның екеуі былтыр ашылған. Соның арқасында кейбір бағыттарда көмек көрсету уақыты үш-төрт сағатқа дейін қысқарды.

Баспасөз қызметінің мәліметінше, туристердің дайындықсыз жүруі, ауа райы болжамына мән бермеуі, бағыттарды білмеуі және өз мүмкіндіктерін асыра бағалауы - қайғылы оқиғалардың негізгі себептері. Сонымен қатар, көбі бағыт таңдағанда тек әлеуметтік желілердегі жазбалар мен бейнероликтерге сүйенеді.

2026 жылдың басынан бері 120-ға жуық іздестіру-құтқару операциясы жүргізіліп, 200-ден астам туристке көмек көрсетілді.

Құтқарушылар бағытты алдын ала жоспарлауға, ауа райы болжамын зерттеуге, ыңғайлы аяқ киім мен киім киюге, тауға жалғыз шықпауға, тексерілген гидтердің қызметіне жүгінуге, жақындарына бағыт туралы хабарлауға және жолды міндетті түрде тіркеуге кеңес береді.

Төтенше жағдай туындаған жағдайда 112 нөміріне қоңырау шалу қажет.

Google News арқылы жаңалықтарымызды қадағалаңыз