Тәулік бойы іздеу және тоқтатылған рейс ерекше жолаушы бортта дүрбелең туғызды

Жапонияда ұшақ бортынан жылан табылғандықтан рейс тоқтатылды. Ұзындығы шамамен 40 сантиметр болатын рептилия ұсталғанға дейін бой тасалап үлгерген. Іздеу жұмыстары бір тәулікке жуық уақытқа созылды, деп хабарлайды Tengri Travel.

Жылан ұшаққа қалай кіріп кеткен?

Оқиға 19 қазанда Фукуока әуежайында болған. Chosun мәліметіне сүйенсек, ATR 42 ұшағының ұшқышы кабинадан ұзындығы 40 сантиметрге жуық жыланды байқап қалған.

Ұшақ Симанэ префектурасындағы Идзумо әуежайынан келіп қонған және сол күні сағат 12:50-де Фукуокадан кері ұшуы тиіс болатын.

Жылан ұшуға дайындық кезінде табылды. Алайда оны бірден ұстау мүмкін болмады: рептилия тығылып қалған, ал іздеу нәтиже бермеді. Соның салдарынан жоспарланған рейс тоқтатылды.

Japan Today дерегінше, Japan Airlines тобына кіретін Japan Air Commuter әуекомпаниясы оқиғаның мән-жайын нақтылады. Жыланды ең бірінші механик байқаған. Рептилия Фукуока әуежайында тұрған ұшақтың кілемінің астына жасырынған.

"Шақырусыз жолаушыны" шамамен бір тәуліктен кейін барып ұстау мүмкін болды. Ол үшін жабайы жануарларды бақылау жөніндегі маман тартылды.

Әуекомпания жыланның бортқа қалай тап болғанын түсіндіре алмады. Тасымалдаушы өкілдері бұған дейін мұндай жағдайдың болмағанын атап өтті.

Айта кетейік, жақында басқа бір ұшақтың жолаушылары да жағымсыз жағдайға тап болды. Лимадағы Хорхе Чавес атындағы халықаралық әуежайда Пиура қаласына ұшуы тиіс LATAM Airlines әуекомпаниясының лайнері өртенді.

Бізді Google-дың негізгі дереккөздер тізіміне қосыңыз