Таяу Шығыстағы саяси ахуал шатқаяқтап тұр

Хамасқа қысым күшейді

Кейінгі шабуылдарға қатысты ХАМАС пен Израиль бір-бірін кінәлаудан жалығар емес. Пікірлері қиыспай-ақ қойды. Израильдің аңдығаны ХАМАС. Санағаны тұтқындардың мәйіті. Өлгендердің сүйегін іздейміз деп, Газада қирамаған  жер қалмады. Десе де, есептің түгенделер түрі жоқ. 15-і тапсырылды. Әлі 13 адамның мүрдесі қайтқан жоқ. Мұны Израиль өзіне ұпай ретінде жинап, ХАМАС-ты тығырыққа тіремек. Таяуда ат басын Ақ үйден Израильге бұрған АҚШ вице-президенті де іс насырға шабатын болса, оған кінәлі ХАМАС деп кесіп айтты.

Израиль

Джей Ди Вэнс, АҚШ вице-президенті:

- ХАМАС өзін келісім талаптарына сай ұстамаса, оған қарсы қолданылатын жаза қатаң. Қарулы топ қаруын толық тастауға тиіс. Олар келісім шарттарын қабылдады. Енді соған сай әрекет етуі керек. Осы мәселені бір жақты етпей, гуманитарлық көмекке қатысты жағдайды толық реттеу мүмкін емес.   

ХАМАС-қа қысым күшейді. Тіпті Дональд Трамп Газа секторына әскер жіберуге де әзір. Бұл туралы ол өзінің Truth әлеуметтік желісіндегі парақшасында жазды. Ақ үй басшысы бұл ойын араб елдері қолдайтынын, өтініш жасаса ХАМАС-ты тізе бүктіруге өзге елдер де әскер жұмылдыруға қарсы емес екенін жазды. Десе де, бұл қай елдер екенін атын атап, түсін түстегені жоқ. Тек Индонезияға ерекше алғысын білдірді.

ЦИТАТА:

Таяу Шығыста аса құрметке ие біздің серіктеріміз егер ХАМАС келісім шарттарынан тайқитын болса, оларға қарсы Газаға қарай күш жіберу қажет деген ойымды қолдап отыр. ХАМАС оң шешім қабылдап, дұрыс әрекет етеді деген үміт әлі де бар. Бұлай болмаса, ХАМАС-қа қатысты шешім қабылдау тез әрі қатаң болады.

Дональд Трамп, АҚШ Президенті

Катар Израильді айыптады 

ХАМАС-қа қысым күшейгенімен, Израильге тағылған қатаң айыптаулар азайған жоқ. Қақтығысушы тараптардың арасында араағайын елдің бірі Қатар әлі де Израильдің өткен айда Дохаға жасаған шабуылын ұмытпаған сыңайлы. Қатар әмірі, Израильге қатысты қатаң ұстанымда болса да, арағайындық жасауды жалғастыратынын айтты. 

Оның пікірін Түркия басшысы да қолдайды. Қазір Парсы шығанағында ресми сапармен жүрген Режеп Тайип Ердоған Қатар Әмірімен кездесу кезінде,, бұл келісімнің оңай жүзеге аспағанын, оның сақталуы маңызды екенін әр ел қаперінде  жақсы ұстау керек деді. 

Тәмим бен Хамад әл Тани, Катар әмірі:

- Израиль барлық заң мен талаптан аттап, қақтығысты реттеу туралы жауапкершілік алған елдің сеніміне сызат түсіріп отыр. Біз мұны мемлекеттік терроризм деп танимыз. Әрі Газада кейінгі 2 жылда болған оқиғаның салмағы геноцидпен тең. Әрі бұған алпауыт елдердің бей-жай қарайтыны өкінішті. 

Катар, Доха

Халықаралық соттың Израильге талабы бар 

Нидерланд, Гаага

Ал Халықаралық сот, Израильге Газа секторына кіретін гуманитарлық көмекті шектемеуді, керісінше оны ұлғайтуды міндеттеді. Осыған дейін, Израиль Таяу Шығыстағы Біріккен Ұлттар ұйымының палестиналық босқындарға көмек көрсету ұйымында ХАМАС өкілдері да бар деп, ұйым қызметін тоқтатып тастаған болатын. Бірақ оны Халықаралық сот жоққа шығарды.

Еуроодақ Газаға көмекті күшейтеді

Ал Еуропалық Одақ Газа секторын қалпына келтіру үшін, палестиналық донорлар тобын құрмақ. Бұл туралы Урсула Фон дер Ляйен, Еуроодақ пен Мысыр саммитінде айтты. Сондай-ақ алдағы уақытта Кәрі Құрлық Таяу Шығыстағы қақтығыстан зардап шеккен палестиналықтарды қолдауға бағытталған шараларды жүзеге асыруға ниетті. 

Сондай-ақ Еуроодақ Рафахта гуманитарлық көмек жеткізуге қатысты өзінің EUBAM атты миссиясын жүзеге асыру жоспары бар. Ол үшін әуелі Мысырмен дипломатиялық байланысты күшейтпек.

Урсула Фон Дер Ляйен, Еуропалық комиссияның төрағасы:

- Біз Палестина үшін донорлар тобын құруға дайындалып жатырмыз. Бұл топ халықаралық серіктестерді біріктіріп, реформаларды ілгерілету мен Палестина әкімшілігін қолдау ісінде бірлесіп жұмыс істейтін болады. Осылайша ол заманауи, нығайтылған және Палестина халқының игілігі үшін өз міндеттерін орындай алатын құрылымға айналады. 

Израиль кейінгі аптада Газа секторына 153 тонна бомба тасталғанын мойындады. Бірақ опат болған 44 адам үшін ақталған жоқ. Ал 2 жылдағы қақтығыс құрбандарының саны 70 мыңға жуықтады.