Тәжікстанда қазақстандық бітімгерлерді еске алу рәсімі өтті

Қазақстан елшісі Уәлихан Төреханов құттықтау сөзінде 1993 жылдың қаңтарында ТМД мемлекет басшылары тәжік-ауған шекарасын қарулы топтардан бірлесіп қорғау туралы келісімге қол қойғанын атап өтті. Сегіз жыл бойы 10 мыңнан астам қазақстандық сарбаз бен офицер ТМД-ның оңтүстік шекараларын қорғап, бауырлас Тәжікстан халқына көмек көрсетті.

— 1995 жылдың сәуірінде Дарваз ауданының Пшихавар шатқалындағы қайғылы оқиғалар кезінде Қазақстанның 7-ші бірлескен ротасы шабуылға ұшырады, бес сағатқа созылған шайқас салдарынан 17 әскери қызметші қаза тауып, ондаған адам жарақат алды. Қаза тапқан бес әскери қызметші 2-ші дәрежелі «Айбын» орденімен, он екі әскери қызметші — «Жауынгерлік ерлігі үшін» медалімен марапатталды. Біз қазір сол оқиғалардың ардагерлерімен бірге жауынгерлерімізді еске алу үшін бірге тұрмыз, — деді дипломат.

ТР Шекара әскерлері төрағасының бұрынғы орынбасары, генерал-лейтенант Сафарали Сайфуллоев қазақ халқының Тәжікстанның мемлекеттік шекарасы мен ТМД-ның оңтүстік шекараларының қауіпсіздігін қамтамасыз ету бойынша жанқиярлық көмек көрсетудегі үлесін атап өтті.

— Қазақстандық сарбаздар ерекше батылдық, төзімділік және әскери борышына адалдық үлгісін танытты. Біз өз есімдерін халықтарымыздың тарихында мәңгілікке сақтап қалған бауырлас Қазақстанның 17 ұлын ерекше қайғырып еске аламыз. Олардың ерліктері — шынайы бауырластық, ынтымақтастық және өзара қолдаудың символы. Тәжікстан халқының бейбітшілігі мен тыныштығы үшін құрбан болған батырларға мәңгілік даңқ, — деп түйіндеді С. Сайфуллоев.

Қазақстандық сарбаздардың ерлігін еске алу үшін 2007 жылы Душанбедегі Ә. Фирдауси саябағында және 2019 жылы Дарвазада қаза тапқан сарбаздардың қызмет атқарған жерде ескерткіш тақталар орнатылды. Адамдар жыл сайын осы тақталарға гүл шоқтарын әкеліп жүр.

Осыған дейін Тәжікстанның ардагерлері қазақстандық интернационалист-жауынгерлерді құттықтағанын жаздық.