Толық аншлаг: NU студенттер оркестрінің концерті 1500 көрермен жинады

Nazarbayev University-дің студенттер оркестрі (NU Orchestra) еліміздің симфониялық музыка тарихында жаңа бет ашты. Ғылым қызметкерлері күніне орай шығармашылық ұжым елордадағы бірегей сахнаның бірі – Бейбітшілік және келісім сарайында жеке концерт қойды. Ауқымды іс-шараға көрермендер айрықша қызығушылық танытты. Оған 1500 адам жиналды. Концерт толық аншлагпен өтті.

«Around the World» («Дү­ние­жүзілік саяхат») деп атал­ған концерттік бағдарлама екі сағатқа созылып, нағыз му­зы­калық саяхатқа айналды. Бұл кеште әлемнің 13 елінің мә­де­ниетін асқақтатқан 24 му­зы­­калық туынды орындалды. Әсіресе оркестр репертуа­рында ұлттық мұра мен әлем­дік тренд ғажап үйлесімді шық­ты. Сахнада халқымыздың дәс­түрлі әндері мен күйлері ғана емес, шетелдік поп-хиттер мен танымал саундтректердің аспаптық каверлері шыр­қалды.

Айта кетейік, концертке му­зыкалық аспаптардың біре­гей құрамы айрықша ажар берді. Бір сахнада домбыра, шертер, қобыз, сыбызғы, жетіген сияқты қазақтың ұлттық аспаптарымен қатар, скрипка, виолончель, флейта, саксофон, фортепиано, электро және бас гитаралар, барабандар мен түрлі перкуссияны қамтитын классикалық және заманауи аспаптар керемет үйлесім тапты.

Кешке қатысқан универ­си­теттің академиялық бас­шы­лығы да атқарылған жұ­мыс­тың ауқымын өте жоға­ры бағалады. Айталық, NU президенті, профессор Вакар Ахмад білім алушы­лар­дың жан-жақты дамуының маңызына тоқталды.

«Студенттеріміздің музы­ка­­лық кәсіби деңгейі таңға­ларлық десе болады. Егер сахнада студенттер оркестрі өнер көрсетіп жат­қанын білмесек, оны ажырату мүмкін емес еді. Өз басым студенттермен мақтанамын. Олар инже­нер және ғалым бола тұрып, соны­мен бірге тамаша музыкант әрі әртіс бола алады. Кәсіби ортада біз қолда­на­тын көптеген дағды – уақытты басқару, командада жұмыс істеу. Сондай-ақ көшбасшылықты өз мойнына алу секілді қасиеттер оқу аудиториясынан тыс жерде қалыптасады», деді ол.

Ал NU «Orchestra» клубы­ның президенті Арсен Елтай студенттер ұйымының университеттен тыс жерде мың жарым көрерменді қалай жинай алған құпиясымен бөлісті. «Бұның артында үлкен командалық жұмыс тұрды. Сондай-ақ мықты тұжырымдама, сапалы визуал, әлеуметтік желідегі белсенділік, түлектеріміз бен се­ріктестеріміздің қолдауы бізге дем берді. Концерт өз көрерменін табады деп сендік. Бірақ 1500 адам жиналып, толық аншлаг болуы бізге қуат беріп, шабыттандырған нәтиже болды», деді А. Елтай.

Сонымен бірге Арсен тәжі­рибелі студенттердің жыл сайын оқу бітіріп, олардың орнына жаңадан түлектердің келуіне қарамастан, оркестр­дің көптеген жыл бойы кә­сі­би­­ліктің осындай жоғары деңгейін қалай сақтап келе жатқаны туралы сұраққа да жауап беріп, ішкі дәстүрдің маңызын ерекше атап өтті. «Менің ойымша, біздің басты күшіміз адамдар мен өнерде дер едім. Иә, жыл сайын мықты музыкант студенттер оқу бітіреді. Олардың орнына 1-курс студенттері келе­ді. Бірақ оқу орнында тәлім­герлік жұмыс жүйелі жолға қойылған. Жоғары курс сту­дент­тері жаңадан оқуға түскен жастарды оркестр құрамына қабылдап, оларға музыкалық жа­ғы­нан ғана емес, сонымен бірге «Orchestra» клубының рухын сезінуге көмектеседі. Осының арқасында дыбысталу деңгейіміз бен жұмысқа деген көзқарасымыз сақталады. Ең бағалысы – түлектеріміздің көбі университет бітіргеннен кейін де бізбен байланысын үзбейді. Үнемі қолдау көрсетеді. Кон­цертке келеді. Кейде түрлі жоба­ларға да қатысады. Міне, осы жастардың арасын­дағы сабақтастықты қалып­тастырады», деді Арсен Елтай.

Шынында, Бейбітшілік және келісім сарайының сахна­сындағы студенттер оркестрінің сәтті дебюті NU студенттік баста­ма­лары­ның жаңа сапалы дең­гей­ге көтерілгенін, сондай-ақ биік мақсатты жобалардың кәсі­би деңгейде жүзеге асып жат­қанын дәлелдеді. NU «Orchestra» студенттердің әр буы­­нын музыкаға деген сүйіс­пен­­шілікпен бірік­тіріп, универ­ситеттің шығар­машылық қуа­ты­­ның рәмізі  болып қала береді.

Соңғы жаңалықтар

Шымкентте Мәдениет және өнер университеті құрылады

Саясат • Бүгін, 08:02

Жергілікті көшбасшыларды даярлаудың жаңа бағдарламасы

Саясат • Бүгін, 08:00

Алматы энергетикалық кешені жаңғыртылып жатыр

Саясат • Бүгін, 07:55

Жүргізуші куәлігін алу тәртібі өзгереді

Саясат • Бүгін, 07:50

Жаңбыр,найзағай,қатты жел: ертең ауа райы күрт өзгереді

Ауа райы • Кеше

Тарихи келісім: Израиль мен Ливан 40 жыл үзілістен кейін келіссөзге келді

Әлем • Кеше

Емдеу мен дәрі-дәрмек төлемдеріне жаңа талап енгізіледі

Медицина • Кеше

Музыка мұғалімдері мемлекеттік наградалармен марапатталды

Мәдениет • Кеше

Шымкентте Мәдениет және өнер университеті құрылады

Аймақтар • Кеше

Елімізде 103 суару каналы автоматтандырылады

Шаруашылық • Кеше

Шымкентте кортеж жасаған жүргізушілер жазаға тартылды

Аймақтар • Кеше

«AMANAT» партиясы жаңа жобаны іске қосты

Партия • Кеше

Германия Украинаға әуе қорғанысын күшейтуге миллиардтар бөлді

Әлем • Кеше

Жас ғалымдар Президент табыстаған пәтерлерге қоныстанды

Президент • Кеше

Алматы зообағында қонжықтарға ат қою науқаны басталды

Табиғат • Кеше

Барлық жаңалықтар