Тоқаев 16 жасқа толмаған балаларға әлеуметтік желілерге тыйым салу туралы пікір білдірді

Қазақстан Президенті Қасым-Жомарт Тоқаев 16 жасқа толмаған балаларға әлеуметтік желілерде тіркелуге тыйым салу туралы пікір білдірді. Бұл туралы Мемлекет басшысы Астанада өткен Тамыз конференциясында мәлімдеді, - деп хабарлайды Tengrinews.kz Ақордаға сілтеме жасап.

Мемлекет басшысы Қасым-Жомарт Тоқаев өскелең ұрпақтың психологиялық саулығын сақтау туралы пікір білдірді.

"Әлеуметтік желілер, цифрлық платформалар, жасанды интеллект пен агрессивті маркетинг балалар дүниетанымына отбасы мен мектептен кем әсер етпейді. Өскелең ұрпақтың психологиялық саулығы мен эмоциялық тұрақтылығы, адамгершілік тәрбиесі ұлттық қауіпсіздікке және елдің орнықты дамуына ықпал ететін маңызды факторға айналды. Қазіргі жағдай 2018 жылы қабылдаған "Балаларды денсаулығы мен дамуына зардабын тигізетін ақпараттан қорғау туралы" Заңды қайта қарауды және елеулі өзгерістер енгізуді талап етеді. Үкімет 16 жасқа толмаған пайдаланушыларға әлеуметтік желіде тіркелуге тыйым салатын заң жобасын әзірледі (биыл маусым айында Парламент қарауына ұсынылды). Құрылтайдың бірінші сессиясының ашылуында депутаттарға осы мәселені қарастыруды ұсынамын", - деді Президент.

Мемлекет басшысының сөзінше, көптеген озық елдер осы іспеттес шаралар қабылдады.

"Бізге де балалардың психологиялық жай-күйіне төнген қауіптің салдарымен күресуді доғарып, алдын алатын кез келді деп ойлаймын. Әйтпесе бұл қоғамның тұрақтылығына кері әсерін тигізеді. Үкімет балаларды қорғау мақсатында мазмұнды (контентті) сүзгіден өткізу шараларын қабылдағаны жөн. Белгілі бір, мейлінше объективті себептерге байланысты жауапкершілікті ата-аналарға ғана артып қоя алмаймыз. Сондықтан балаларға арналған міндетті SIM-карталарды енгізу тәжірибесін жаппай таратуды тапсырамын. Бұл олардың ақпараттық иммунитетін қамтамасыз ете алады", - деді Президент.

Қазақстанда балаларға әлеуметтік желілерге шектеу қойылуы мүмкін екені туралы былтыр айтыла бастаған еді. 2025 жылғы желтоқсанда Мәдениет министрлігі "Ашық НҚА" порталында "Онлайн-платформалар және масс-медиа мәселелері бойынша кейбір заңнамалық актілерге өзгерістер мен толықтырулар енгізу туралы" заң жобасын жариялады.

Негізгі ереже "Онлайн платформалар және онлайн жарнама туралы" заңның жаңа 10-1 бабында көрсетілген:

"Жедел хабар алмасу сервистерінде тіркелуді қоспағанда, он алты жасқа толмаған пайдаланушылардың онлайн-платформаларда тіркелуіне тыйым салынады" (заң жобасы, 11-бап, 5-тармақ - жаңа 10-1 бап).

Осылайша, 16 жасқа толмаған балаларға платформалардың көпшілігінде аккаунт ашуға тыйым салынады деп болжанған. Ерекшелік тек мессенджерлерде.

Бұған дейін біз 16 жасқа толмаған балалардың әлеуметтік желілерді пайдалануына тыйым салу нормасының үкіметте талқыланғаны туралы жазған едік.

Google News арқылы жаңалықтарымызды қадағалаңыз