Трамп Испанияға экономикалық шектеулер енгізеді

АҚШ президенті Дональд Трамптың Испанияға қарсы сауда тарифтерін енгізу туралы мәлімдемесі екі ел арасындағы дипломатиялық қатынастарды шиеленістірді. Ақ үй басшысы Испанияны НАТО-ның қорғаныс шығыны бойынша міндеттемелерін орындамады деп айыптап, экономикалық шектеулер енгізетінін ескертті. Испания үкіметі мен Еуропалық комиссия бұл жайтты қысым деп қабылдады.

Испания геосаясат жағынан НАТО-ға мүше ең маңызды мемлекеттердің бірі. Пиреней түбегіндегі ел Атлант мұхиты мен Жерорта теңізінің түйіскен стратегиялық аймағында  орналасқандықтан, одаққа қауіпсіздік және логистикалық қолдау тұрғысынан да құнды. Ресми Мадрид қорғаныс шығынын ІЖӨ-нің 2,1 пайызына дейін арттыратынын жариялады, бұл АҚШ пен кейбір одақтас мемлекеттердің талап еткен бес пайыздық межесінен төмен. АҚШ президенті Дональд Трамп Испанияны осы шешімі үшін сынға алып, экономикалық санкциялар мен сауда жазасын қолданатынын еске салды.

Дональд Трамп, АҚШ президенті:

- Испания өз міндетін орындаған жоқ. Испания НАТО-ға адал болмады. Мүше елдер қорғаныс шығынын 5%-ға дейін көтерді, Испания ғана қарсы шықты. Меніңше, Испания бұл үшін сөгіс алуы керек. НАТО-ның шешімі де солай болуға тиіс. 

Еурокомиссия өкілі Олоф Гилл сауда саясаты Брюссельдің құзыретіне жататынын атап, кез келген әрекетке лайықты жауап болатынын мәлімдеді. Испания үкіметі де Трамптың сауда санкцияларына қатысты ресми ұстанымын жариялады. Қорғаныс министрі Маргарита Роблес елдің НАТО алдындағы міндеттемелерін толық орындап отырғанын, Балтық елдері, Латвия, Словакия мен Түркияда өтетін альянс миссияларына белсенді қатысып келе жатқанын айтты. Сонымен қатар ол Испанияның Атлантикалық одаққа адалдығын атап өтті. Шамамен 3000 әскери қызметкердің түрлі халықаралық операциялар мен миссияларға тұрақты қатысып, НАТО-ның ұжымдық қауіпсіздік шараларына қосқан үлесін еске салды. 

Маргарита Роблес, Испания қорғаныс министрі:

- Испания — жауапты, сенімді және берік серіктес, Атлантикалық одақ алдындағы өз міндеттемелеріне толық адал. Қазіргі таңда испан әскери қызметкерлері НАТО миссиялары аясында Латвия мен Словакия аумағын қорғауға, Литва әуе кеңістігінің қауіпсіздігін қамтамасыз етуге, сондай-ақ Балтық теңізі аймағындағы әуе және теңіз операцияларына қатысады.  Сондықтан біздің НАТО алдындағы әскери міндеттемелеріміз толығымен орындалып жатыр. Бұл жұмыстар  алдағы уақытта да жалғасады.