Трамптың Қытаймен сауда қақтығысы туралы мәлімдемесі криптовалюта нарығын құлатты

Жұма күні кешке биткоиннің бағасы күндізгі 122 мың доллардан шамамен 105 мың долларға дейін төмендеді.

Сенбі таңертең биткоин бағасы қайтадан 112 мың долларға көтерілді.

Баға өзгерістеріне АҚШ президентінің 1 қарашадан бастап Қытайдан келетін барлық импортқа кедендік баж салығын енгізу туралы мәлімдемелері себеп болды.

Дональд Трамп Қытайды «сауда саласында өте агрессивті позиция ұстады» деп атап өтті.

Ал Қытай бір күн бұрын сирек металдарға экспорттық шектеулер енгізген болатын. Қытай — әлемдегі сирек металдардың негізгі жеткізушісі, олар түрлі жоғары технологиялық салалар үшін, соның ішінде АҚШ-та да маңызды рөл атқарады.

Трамптың жаңа баж салығын енгізу туралы мәлімдемелеріне Бейжің әлі жауап берген жоқ.

Бұған дейін АҚШ-тың Федералды апелляциялық соты Трамптың енгізген көптеген баж салықтары заңсыз деп шешім шығарып, кейіннен әкімшілік бұл тарифтерді сақтау үшін Жоғарғы сотқа жүгінген болатын.