Тротуар жабылды жолмен жүру керек пе? Алматыдағы қауіпсіздікке кім жауапты

Алматыда бірнеше ірі көше қазылып тасталды. Жөндеу жұмыстары Абай, Сәтбаев және басқа да учаскелердегі жаяу жүргіншілер аймағын жауып тастағандықтан, қала тұрғындары құрылыс алаңын жолдың жүру бөлігімен айналып өтуге мәжбүр. Tengrinews.kz қауіпсіз өткелді кім қамтамасыз етуге міндетті екенін және әкімдіктің бұған не деп жауап бергенін анықтады.

Алматылықтар неге шағымданды?

Алматылықтардың бірі бірден бірнеше проблемалық учаскені көрсетті. Оның айтуынша, Абай даңғылының Сейфуллин мен Байтұрсынов аралығындағы бөлігінде жөндеу жұмыстарына байланысты жаяу жүргіншілер кей жерлерде жолдың жүру бөлігіне шығуға мәжбүр.

"Алматы әкімі мырзаға сұрақ. Осылайша бүкіл қаланы қазып тастады, оның аяғы көрінетін емес. Ұрандары сондай асқақ әрі жағымды: "келер ұрпақ үшін"! Ал қазіргі ұрпақ есепке алынбай ма? Айтарға сөзім жоқ", – деді жазды автор жазбасында.

Threads желісіндегі @erik_tastembekov пайдаланушысының видеосы

Басқа бір роликте ол Сәтбаев пен Сейфуллин қиылысындағы жабылып қалған тротуарды көрсетті.

"Қалай өту керек, айтыңыздаршы? Сіздер маған жаяу жүргіншілер үшін қауіпсіздік жасап жатырмыз деп жауап берген едіңіздер. Міне, жалғыз жол – көліктер бір сантиметр жерде зымырап жатқан жолдың жүру бөлігімен жүру. Жаяу жүргіншілерге деген қандай қамқорлық туралы айтып отырсыздар?" – дейді видео авторы.

Threads желісіндегі @erik_tastembekov пайдаланушысының видеосы

Мердігерге қауіпсіз өткел ұйымдастыру тапсырылады

Алматы қалалық Қоғамдық кеңістіктерді дамыту басқармасы Абай даңғылында қазір "қасбеттен қасбетке дейін" қағидаты бойынша абаттандыру жұмыстары жүріп жатқанын хабарлады.

Бұған дейін "АЖК" мұнда электр желілерін тартса, енді мердігер жарықтандыру желілері мен автоматты суару жүйесін орнатумен айналысып жатыр. Осыдан кейін жұмысшылар жаңа тас төсемдер төсейді.

Әкімдік жөндеу жұмыстары жаяу жүргіншілер қозғалысын шектегенін мойындады. Шағымдардан кейін мердігерге қауіпсіз өткел ұйымдастыру тапсырылады.

"Мердігер ұйымға "Джерси" су толы блоктарын пайдалана отырып және жұмыс аймағын тиісті түрде қоршау арқылы жаяу жүргіншілердің қауіпсіз өтуін қамтамасыз ету туралы тапсырма беріледі", – деп хабарлады басқарма.

Сәтбаев көшесіндегі учаске бойынша жағдай қалай?

Сәтбаев көшесінде абаттандыру жұмыстары Байзақовтан Луганскийге дейінгі учаскеде, сондай-ақ "қасбеттен қасбетке дейін" принципі бойынша жүргізіліп жатыр. Қазір жұмысшылар Сейфуллин мен Байтұрсынов аралығындағы кесіндімен айналысып жатыр: солтүстік жағында ескі жабын демонтаждалып, инженерлік желілер тартылып, аумақ әрі қарай абаттандыруға дайындалады.

Шағымдардан кейін мердігерге жаяу жүргіншілерге арналған қауіпсіз маршрут сызбасын орналастыру да тапсырылады.

Бұл ретте басқарма Сәтбаев көшесінің оңтүстік жағында қауіпсіз өткел бар екенін алға тартады. Әкімдік мәліметінше, ондағы гранит жабыны шамамен 90 пайызға төселген.

"Құрылыс-монтаждау жұмыстарына байланысты уақытша шектеулерге түсіністікпен қарауды сұраймыз. Барлық жұмыс аумақты кешенді абаттандыру және қолайлы әрі қауіпсіз қалалық орта қалыптастыру мақсатында кезең-кезеңімен орындалады", – деп толықтырды басқарма өкілдері.

Құрылысшылар қауіпсіз өткел қалдыруға міндетті ме?

Адвокат Абзал Қасымжанов Tengrinews.kz-ке айтуынша, көшелерді жөндеу кезінде жаяу жүргіншілер қауіпсіздігі алдын ала ойластырылуы тиіс. Жұмыстың уақытша сипаты бұл талапты жоққа шығармайды.

"Егер қолданыстағы өткел жабылса, нақты жарамды әрі қауіпсіз маршрут қарастырылуы қажет. Егер "Айналып өту" тақтайшасы адамды өтуге келмейтін жиектасқа, баспалдаққа немесе көлік ағынына бағыттаса, ол мәселені шешпейді", – деп түсіндірді адвокат.

Бұл ретте заң уақытша маршруттың бұрынғы жолды толық қайталауын талап етпейді. Ол ұзағырақ болуы мүмкін, бірақ қауіпсіз және барлық адамға, соның ішінде мүгедектігі бар жандарға қолжетімді болуы тиіс.

Анықтама: Қасымжановтың айтуынша, "Автомобиль жолдары туралы" заңның 19-3-бабының 3-тармағы қозғалысты ұйымдастыруды және жұмыс орындарын қоршауды алдын ала жоспарлауды, содан кейін жөндеу кезінде оларды үнемі тексеріп отыруды талап етеді.

Кім жауапты – әкімдік пе әлде мердігер ме?

Барлық жауапкершілікті тек бір тарапқа жүктеуге болмайды, деп түсіндіреді адвокат.

Алматыда Қала аумағын абаттандыру қағидалары қолданылады. Олар тапсырыс берушінің де, мердігердің де міндеттерін қарастырады.

"Барлық жауапкершілікті автоматты түрде тек мердігерге немесе тек әкімдікке жүктеу дұрыс емес. Тапсырыс берушіні, орындаушыны, шарттың мазмұнын және нақты кімнің міндеті орындалмағанын анықтау керек", – деп атап өтті Қасымжанов.

Фото Tengrinews.kz

Мысалы, инженерлік коммуникациялардағы жұмыстар кезінде мердігер жөндеу орнын қоршап, нысан, тапсырыс беруші, мердігер, жауапты тұлға және жұмыс мерзімі туралы мәліметтер жазылған ақпараттық тақтайша орнатуы тиіс.

Айналып өту жолы қандай болуы керек?

Адвокаттың айтуынша, қауіпсіз маршрутты тұтас бағалау керек: адам оған кіре алуы, бүкіл учаскені жүріп өтіп, қалыпты тротуарға қайта оралуы тиіс. Әсіресе, жүріп-тұруы шектеулі қала тұрғындарының мұқтаждығын ескеру өте маңызды.

"Өтпе жолды оның бүкіл ұзындығы бойынша бағалау керек. Адам оған қауіпсіз кіріп, өтіп немесе жүріп өтіп, қолданыстағы тротуарға қайта оралу мүмкіндігіне ие болуы тиіс", – деп түсіндірді Қасымжанов.

Тәжірибеде қауіпсіз айналып өту жолы қауіпті аймақтың берік қоршалуын, тәуліктің қараңғы уақытында тиісті көрінуді және жол жабылған жерге жеткенге дейінгі түсінікті көрсеткіштердің болуын да қарастырады.

Айыппұл салынуы мүмкін бе?

Бұзушылық түріне байланысты жауапкершілік Әкімшілік құқық бұзушылық туралы кодекстің әртүрлі баптары бойынша туындауы мүмкін.

Адвокат атап айтқанда, 83-бапты – мүгедектігі бар жандардың әлеуметтік және көлік инфрақұрылымы нысандарына қолжетімділігін қамтамасыз етпегені үшін, 505-бапты – абаттандыру ережелерін бұзғаны үшін, сондай-ақ 631-бапты – жолдарда жұмыс жүргізу және оларды күтіп ұстау кезіндегі талаптарды бұзғаны үшін атап өтті.

"ӘҚБтК-нің аталған баптары бір факт бойынша автоматты түрде бірнеше айыппұл тағайындауды білдірмейді. Саралауды уәкілетті орган анықтайды", – деп атап өтті адвокат.

Бұған дейін Алматыда Абылай хан даңғылының бір бөлігінде көлік қозғалысы шектелетіні белгілі болды. 8 және 9 қыркүйек күндері сағат 22:00-ден 06:00-ге дейін Райымбек даңғылынан Мәметова көшесіне дейінгі учаскеде қозғалыс жабылады.

Google News арқылы жаңалықтарымызды қадағалаңыз

Жазылу