Түркістан облысында егісті сумен қамтамасыз ету мәселесі қалай шешіліп жатыр

Облыстық ауыл шаруашылығы басқармасының мәліметінше, биыл өңірде 919 мың гектар алқапқа ауыл шаруашылығы дақылдарын егу жоспарланған. Бұл өткен жылмен салыстырғанда 8 мың гектарға артық. Оның ішінде 536 мың гектарға жаздық, 208 мың гектарға күздік, ал 175 мың гектарға мал азықтық дақылдар орналастырылады.

Аймақтың климаттық ерекшеліктеріне байланысты көктемгі дала жұмыстары қаңтар айынан басталған. Қазіргі уақытта облыста жоспарланған 536 мың гектар алқапқа 92 мың гектар жаздық дақылдар егілді.

— Өнім көлемін екі есеге арттыру жөніндегі жол картасы аясында биыл бірқатар дақылдардың егіс көлемі ұлғайтылады. Мәселен, мақта 17 мың гектарға, жүгері 15 мың гектарға, мақсары 16 мың гектарға артады. Ал су шығынын азайту үшін күріш алқабы 7 мың гектарға қысқартылып, 3,5 мың гектар шамасында болады, — деді облыстық ауыл шаруашылығы басқармасы басшысының орынбасары Әлібек Плалов.

Өңірде жыл сайын су жеткізу мәселесі өзекті. Биыл ауыл шаруашылығы дақылдарына қажетті ағын су лимиті 3,8 млрд текше метр болып белгіленген. Бұл өткен жылмен салыстырғанда 200 млн текше метрге аз.

— Облыс аумағында жалпы сыйымдылығы 8,8 млрд текше метр болатын 42 су қоймасы бар. Қазіргі таңда су қоймаларында жиналған су көлемі нормативтік деңгейде, яғни 87 пайызды құрайды. Негізгі Шардара су қоймасы 100 пайызға толған. Ал Бөген және Қосқорған су қоймаларының толуы 99 пайызға жеткен. Қалған су қоймаларын вегетациялық кезең басталғанға дейін жауын-шашынды ескере отырып толықтыру мүмкіндігі бар, — деді спикер.

Бұдан бөлек, өңірде 50 мың гектар алқапта су үнемдеу технологиялары енгізілмек. Соның нәтижесінде бұл тәсілдер қолданылатын жер көлемі 164 мың гектарға жетіп, 280,6 млн текше метр су үнемделмек.

Ведомство мәліметінше, көктемгі егіс жұмыстарына қажетті жанар-жағармай, қаржылық қолдау және минералды тыңайтқыштар уақытылы бөлініп жатыр. Қажетті қор жеткілікті.

— Көктемгі дала жұмыстарына 52,5 мың тонна жеңілдетілген жанар-жағармай бөлінді. Босату бағасы литріне — 281 теңге. Бұл нарықтық бағадан 15 пайызға арзан, — деді Әлібек Плалов.

Бұдан бұрын 3 мыңға жуық фермер көктемгі егіс жұмыстарына қаржы алғанын жазған едік.