Түркістан облысындағы сәтті өткен трансплантацияның екі тарихы

Түркістан облыстық клиникалық ауруханасында бауыр мен бүйрек трансплантациясы сәтті өткен соң, екі отбасы бір күнде үйіне шығарылды. Бұл оқиғаның 13 тамызда атап өтілетін Дүниежүзілік донорлық күнімен тұспа-тұс келуінің символдық мәні бар, деп хабарлайды Tengri Health тілшісі.

Ұлы анасына жаңа өмір сыйлады

Бірінші жағдайда 22 жастағы жігіт бауыр доноры болды. Ол органның бір бөлігін трансплантацияға мұқтаж анасына берді.

"22 жыл бұрын анам маған өмір сыйласа, енді мен оған өмір сыйладым. Отаны жасаған және бізге күтім көрсеткен барлық медицина қызметкеріне алғыс айтқым келеді", - деді жас жігіт ауруханадан шығар күні.

Анасы ұлына донор болды

Екінші отбасында осыған ұқсас жағдай болды: анасы 20 жастағы ұлына донор болды. Әйел өз бүйрегін берді.

Сәтті өткен трансплантациядан кейін қос отбасы бір күнде ауруханадан шықты. Бұл олар үшін жаңа өмірдің бастауы болды.

"Бұл оқиға - заманауи трансплантология мүмкіндіктерінің, дәрігерлердің жоғары кәсібилігінің, сондай-ақ ата-ананың шексіз махаббатының, жанқиярлығы мен адам өмірін сақтап қалуға деген ортақ ұмтылыстың жарқын үлгісі", - деп атап өтті Түркістан облысы денсаулық сақтау басқармасының баспасөз қызметі.

Қазақстанда қанша адам трансплантация күтіп отыр

Еске сала кетейік, бүгінде Қазақстанда ағза алмастыру кезегінде 4 739 адам тұр, оның ішінде 125 бала бар.

Пациенттердің басым бөлігі мына ағзаларға мұқтаж:

бүйрек трансплантациясы - 4 208 адам; бауыр трансплантациясы 293 пациентке қажет; жүрек - 208; өкпе - 30.

2026 жылдың бірінші жартыжылдығында Қазақстанда 150 трансплантация жасалды. Оның 30-ы қайтыс болғаннан кейінгі донорлардың ағзасын қолдану арқылы жүзеге асырылды.

Google News арқылы жаңалықтарымызды қадағалаңыз

Жазылу

Трансплантация

донор

Түркістан облысы

дәрігерлер