Түркістан облысындағы кәсіпкерлердің 42 пайызы әйелдер

Еліміздегі демографиялық өсімі ең жоғары өңір Түркістан облысында 185 мыңнан аса көпбалалы ана бар. Әйелдердің өңір экономикасы мен мемлекеттік басқарудағы үлесі де айтарлықтай. Қазіргі таңда, 212 мыңнан астам кәсіпкердің 42 пайызы әйелдер. Мемлекеттік қызметте еңбек етіп жүрген 5 611 маманның 1572-сі нәзікжандылар, оның ішінде 233-і басшылық қызметтерді атқаруда, деп хабарлайды Egemen.kz.

Бұл деректер Түркістанда өткен «Tomiris» ақпараттық-білім беру семинар-тренингінде айтылды. «Отбасы істері және гендерлік саясатты жүзеге асыру» жобасының аясында, әйелдердің көшбасшылық әлеуетін дамыту арқылы олардың саяси, әлеуметтік-экономикалық өмірге белсенді қатысуын арттыру мақсатындағы іс-шараға ҚР Президенті жанындағы әйелдер істері және отбасылық демографиялық саясат жөніндегі комиссия төрағасының орынбасары Лаззат Сүлеймен, Түркістан облысы әкімінің орынбасары Ертай Алтаев, «Amanat» париясының облыстық филиалы атқарушы хатшысының орынбасары, облыстық әйелдер қанатының жетекшісі Қалыйма Жантөреева, «Түркістан облысының Азаматтық Альянсы» заңды тұлғалардың қауымдастық нысанындағы бірлестігінің төрайымы Инара Намазбаева, сондай-ақ бизнес-құрылымдардың өкілдері, өңірдің 17 аудан, қаласынан арнайы саяси менеджмент мектебіне іріктелген 85 іскер әйел, үкіметтік емес ұйымдардың өкілдері қатысты.

Семинар-тренингте «Саясаттағы әйелдер: өзгерістерістердің көшбасшылары» тақырыбында пікір-ұсыныстар ортаға салынып, мәселелер талқыланды. Тренинг соңында арнайы сертификаттар тапсырылды.

ТҮРКІСТАН