Түркістанда арзан жер сатылады деген жалған хабарламалар тарады

Қазіргі таңда Түркістан қаласында 95 350 азамат жер телімін алу үшін кезекте тұр. Кезекке тіркелу 2000 жылдан бері жалғасып келеді.

Қалалық жер қатынастары бөлімінің басшысы Бауыржан Досжановтың айтуынша, соңғы уақытта бірнеше азамат жалған жер телімдеріне қатысты құжаттарды ұсынып, олардың заңдылығын тексеруді сұраған. Тексеру барысында аталған құжаттардың басым бөлігі жалған екені анықталған.

– Қолданыстағы заңнамаға сәйкес, жер телімін сатып алу-сату мәмілесі тек белгіленген тәртіппен рәсімделіп, шекарасы нақты айқындалған және құқық белгілейтін құжаттары толық болған жағдайда ғана жүзеге асырылады, - деді ол.

Қала әкімдігінің мәліметінше, құқықтық мәртебесі айқындалмаған, шекарасы белгіленбеген және мемлекеттік тіркеуден өтпеген жер учаскелерін пайдалануға заң жүзінде жол берілмейді.

– Осыған орай, қала тұрғындары мен жер телімін сатып алуға ниетті азаматтарға мәміле жасамас бұрын жер учаскесінің заңдылығын міндетті түрде қалалық жер қатынастары бөлімінен немесе тиісті мемлекеттік органдардан нақтылап алуды ұсынамыз. Күмәнді ұсыныстар мен делдалдардың уәдесіне сенбеу, алаяқтық әрекеттерден сақтану маңызды, - делінген қала әкімдігі таратқан ақпаратта.

Қала әкімі Әзімбек Пазылбекұлының айтуынша, 2005 жылдан бері Түркістан қаласында кезекте тұрған азаматтарға жер телімдері берілмеген.

– Аталған мәселені шешу мақсатында екі арнайы жоба дайындалған. Былтырдан бастап бұл жобаларды қаржыландыру басталды. Ол жобалар жүзеге асса, Баянауыл бағытында, Қызылорда тас жолының оң жағындағы аумақта кезекте тұрған азаматтарға жер телімдері беріледі, - деді қала әкімі.

Бүгінде аталған аумақта газ жүйелері толық тартылған. Енді электр желілерін жүргізу және су жүйесін тарту жұмыстары қалды.

– Қазір қаржылық мүмкіндік аздау болып тұр. Бірақ бұл жұмыс тоқтамайды. Қаржы толық қарастырылып, тиісті шешім қабылданған жағдайда, кезекте тұрған 1600-ден астам азаматқа жер телімі табысталады, - деді қала әкімі.

Бұдан бұрын Түркістанда 26 жер учаскесі 83 млн теңгеге негізсіз сатып алынғанын жазған едік.