Түркия Қазақстанға The Finiko бөлімшесінің басшысын тапсырды

Түркия 2022 жылдан бері халықаралық іздеуде жүрген The Finiko қаржы пирамидасы құрылымдық бөлімшесінің басшысын Қазақстанға экстрадициялады. Бұл туралы Қаржылық мониторинг агенттігі хабарлады, деп жазады Tengrinews.kz.

Операцияны ҚМА Алматы қаласы бойынша департаментінің қызметкерлері Интерполдың Ұлттық орталық бюросымен бірлесіп, прокуратура органдарының үйлестіруімен жүзеге асырған.

Ведомство мәліметінше, The Finiko нақты кәсіпкерлік немесе инвестициялық қызметпен айналыспаған. Бұрын тартылған қатысушыларға төлемдер жаңа салымшылардан түскен қаражат есебінен жүргізілген.

Осылайша, табыстылық көрінісі жасалып, бұл азаматтардың қаражатын әрі қарай тартуға мүмкіндік берген.

"Күдіктінің заңсыз қызметінің нәтижесінде қаржы пирамидасына салымшылардың 160 миллион теңгеден астам қаражаты тартылған. Сонымен қатар сотқа дейінгі тәркілеу аясында күдіктінің құны 221 миллион теңге болатын жер учаскесі мемлекет пайдасына өткізілді", - деп хабарлады ҚМА.

Бұған дейін аталған қылмыстық іс бойынша үш айыпталушы мүлкі тәркіленіп, 6 жылға дейін бас бостандығынан айырылған болатын.

Тергеу жалғасып жатыр. ҚР ҚІЖК-нің 201-бабына сәйкес өзге ақпарат жария етуге жатпайды.

Еске сала кетейік, 2021 жылдың шілдесінде Қаржы нарығын реттеу және дамыту агенттігі прокуратураның тапсырмасымен компания қызметін тексерген болатын. Агенттік The Finiko жұмысын "қаржы пирамидасы мен қаржылық алаяқтық белгілері анық байқалатын қызмет" деп бағалады.

Кейінірек Алматы қаласының прокуратурасы компанияға қатысты тергеу басталғанын хабарлады.

2022 жылдың маусымында ҚМА The Finiko ұйымдастырушылары Алматы тұрғындарынан екі миллион долларға жуық қаражат жинағанын мәлімдеді.

2024 жылдың тамызында ҚМА The Finiko бөлімшесінің басшысына халықаралық іздеу жариялады.

Бізді Google-дың негізгі дереккөздер тізіміне қосыңыз