Түтін арасынан әріптесін байқамай қалды БҚО да ТЖД қызметкерінің қазасы тергеліп жатыр

Батыс Қазақстан облысында өрт сөндіру кезінде Төтенше жағдайлар департаментінің қызметкері Миршат Марсұлы Халиуллин қаза тапты. Туыстарының айтуынша, ер адам әріптесі тізгіндеген қызметтік көліктің астына түсіп, жарақат алған. Өңірлік ТЖД бұл ақпаратқа қатысты жауап берді, деп хабарлайды Tengrinews.kz тілшісі.

"Түтіннен әріптесін байқамай қалған"

Марқұмның жақындары БАҚ өкілдеріне құтқарушының өрт сөндіру кезінде мерт болғанын мәлімдеді. Ол жазатайым оқиға салдарынан жарақат алған: қызметтік көлік мінген әріптесі оны түтін ішінен байқамай қалып, қағып кеткен делінеді. Ер адам ауруханаға бара жатқан жолда көз жұмды. Артында әкесі, інісі мен қарындасы қалған.

ТЖ департаментінің мәліметінше, қайғылы оқиға 3 қыркүйекте болған.

"Батыс Қазақстан облысының Жәнібек ауданында орналасқан "Татран" қыстағының маңында құрғақ шөп өртенді. Өртті сөндіру жұмыстары кезінде қызметтік міндетін атқару барысында Төтенше жағдайлар департаментінің қызметкері жарақат алды. Зардап шеккен адам Жәнібек ауылының аудандық ауруханасына жеткізілді, алайда көрсетілген медициналық көмекке қарамастан, алған жарақаттарынан қайтыс болды", - деп мәлімдеді ведомство.

Оқиға фактісі бойынша тиісті тексеру жүргізіліп, барлық мән-жай анықталып жатыр.

ТЖД қаза тапқан қызметкердің отбасына барлық қажетті көмек пен қолдау көрсетілгенін, соның ішінде жерлеу рәсімін ұйымдастыруға жәрдем берілгенін қосып өтті.

Бізді Google-дың негізгі дереккөздер тізіміне қосыңыз