ҰБТ форматы өзгертіледі

ҰБТ форматының өзгеруі заман талабы.

Әлемдік жетекші университеттердің барлығы дерлік талапкердің ең алдымен сыни ойлау қабілеті мен  логикасын тексереді. Енді Бірыңғай ұлттық тестілеу форматы да халықаралық стандарттарға бейімделеді. Биыл сынақ ережелері өзгеріссіз қалғанымен келесі кезеңнен бастап сұрақтардың мазмұны түбегейлі жаңармақ.

Ұлттық бірыңғай тестілеу - мектеп түлегі үшін маңызды сынақ. Ал талапкердің тағдырын анықтайтын тестілеуді өткізу сала мамандары үшін жауапты да күрделі міндет. Нышангүл Қожабекқызы - оқушылардың білімін бағалайтын жүйені жасауға атсалысып жүрген ұстаздардың бірі. Айтуынша, бүгінде тест сұрақтары жаттанды білімге емес, оқушының ізденісіне негізделген. Дегенмен, уақыт талабына сай жүйені тағы да жетілдіру қажеттігі туындап отыр.

Нышангүл Қожабекқызы, №82 "Дарын" мамандандырылған лицейінің тарих пәнінің мұғалімі: 

- ҰБТ-ны реформалау мәселесі талқыланып жатыр ғой, айлтс форматы сияқты. айтылым, жазылым, оқылым және тыңдалым арқылы бағалау деп. Бұл реформа қоғам талабы деп есептеймін. Дегенмен, ҰБТ бір күнде жасалған дүние емес, ол қаншама жылдық еңбектің, әдістемелік тәжірибенің қаншама облыстардан келіп, тәжірибелі мұғалімдер құрастырып жатыр. өзімде құрастырушы маман ретінде айта аламын бұл өте үлкен база. 

Жүйедегі өзгерістерді талапкерлер де тағатсыздана күтуде. Мәселен, Нұрәли Болатұлы қазір екі тестке қатар дайындалып жүр. Мақсаты - шетелдегі айтулы университеттердің біріне оқуға түсу. Дегенмен, Ұлттық бірыңғай тестілеуге де дайындық жүргізу қажет. Егер емтихан форматы халықаралық стандартқа сай болса, талапкердің жүгі жеңілдер еді,-дейді ол.

Нұрәли Болатұлы, №82 "Дарын" мамандандырылған лицейінің оқушысы: 

- Ең алдымен октбярь айында тапсырған болатынбыз. физика-математика бағытымен 77 балл алған болатынмын. Мен қазір 2 экзаменге қатар дайындалудамын. Шетелге, Қазақстан университетіне бір экзамен болғанда ол жақсы болатын еді. 

Айта кетейік,  қаңтар айында ҰБТ тапсыруға 187 мыңға жуық адам өтініш берген. Бұл өткен жылмен салыстырғанда 20 мыңға көп. Тестілеу 10 қаңтар мен 10 ақпан аралығында өтеді. Биыл сынақ форматы өзгермейді. Ал келесі жылдан бастап жүйені біршама өзгеріс күтіп тұр. Министрлік Ұлттық бірыңғай тестілеуді халықаралық стандарттарға негіздеуді көздеп отыр.

Гүлмира Қорғанбаева, сарапшы:

- ҰБТ-ның жаңа бағыты мәтінді сараптау, ойды жүйелеу және креативті шешімдер қабылдауға негізделген. Елімізде ашылып жатқан шетелдік университет филиалдары мен бірлескен бағдарламалар жаһандық талаптарды алға тартады. Сондықтан эссе жазу дағдысы — бұл жай ғана емтихан тапсырмасы емес, жаһандық бәсекеге қабілеттіліктің кепілі. Біздің түлектер әлемнің кез келген нүктесінде өз білімін дәлелдей алатын деңгейге көтерілуі тиіс.

Биылғы сынақта оқушыларға 120 тапсырма беріліп, ең жоғары 140 балл жинау мүмкіндігі сақталады. Талапкерлерге ыңғайлы болу үшін цифрлық калькулятор мен Менделеев кестесі экранда қолжетімді болады. Сонымен қатар, тест тапсырушылар сынақ аяқталғаннан кейін 30 минут ішінде апелляцияға өтініш бере алады. Сарапшылар бұл техникалық жеңілдіктер емес, білімді тереңдету маңызды екенін айтады.

Наргиз Бекмағанбетова, Досбол Байдильдин