“Үйде жалғыз қалғанда 2” фильмінің жұлдызы қайтыс болды

Ирландиялық актриса Бренда Фрикер 81 жасында дүниеден озды. Ол қалың көрерменге "Үйде жалғыз қалғанда 2: Нью-Йоркте адасу" Рождестволық комедиясындағы көгершін асыраған әйел рөлімен танымал, деп хабарлайды Tengri Life The Irish Times-ке сілтеме жасап.

Актрисаның қайтыс болғаны туралы оның көпжылдық агенті Фил Белфилд хабарлады.

"Бренда бүгін таңертең, 2026 жылғы 17 шілдеде қысқа уақытқа созылған сырқаттан кейін көз жұмғанын зор күйзеліспен хабарлаймыз. Ол жақындарының ортасында өмірден өтті", - делінген оның отбасы мен достары атынан жасалған ресми мәлімдемеде.

Фрикер 1990 жылы Джим Шериданның "Менің сол аяғым" атты культ драмасында сал ауруына шалдыққан суретші әрі жазушы Кристи Браунның жанқияр анасы миссис Браунның рөлін керемет сомдағаны үшін "Оскар" сыйлығын алып, әлемдік кинематограф тарихына енді. Ол Америка киноакадемиясының алтын мүсінін иеленген тарихтағы алғашқы ирландиялық әйел болды.

"Бренда ирландиялық актерлік мектептің алыбы, парасаты биік, харизмасы мықты және сирек талант иесі еді. Біз енді ешқашан ол сияқты адамды көрмейміз, оның қазасымен дүние босап қалғандай болды. Мен үшін оны білу, жақсы көру және онымен ұзақ жылдар бойы жұмыс істеу үлкен мәртебе болды", - деп толықтырды Фил Белфилд.

Сондай-ақ алпыс жылдық мансабында Бренда Фрикер Ирландияда, Ұлыбританияда және Голливудта театр, кино және телевизия саласында жұмыс істеп үлгергені, өз буынының ең сыйлы әрі танымал актрисаларының бірі ретінде беделді болғаны атап өтілді.

Еске сала кетейік, 2026 жылғы 31 қаңтарда Лос-Анджелесте 71 жасында "Үйде жалғыз қалғанда" кинокомедиясында басты кейіпкердің анасын сомдаған канадалық-америкалық актриса Кэтрин О’Хара қайтыс болған еді. Актриса өлімінің себебі өкпе артериясының тромбоэмболиясы болды – бұл тромбтың өкпедегі қан тамырларын жауып тастауы. Сонымен қатар О’Хара 2025 жылдан бері тік ішек обырымен күресіп келген болатын.

Google News арқылы жаңалықтарымызды қадағалаңыз