Украина 2026 жылы елдің Қарулы күштеріне 66 млрд доллардан астам қаражат бөледі

АСТАНА, 3 желтоқсан - Sputnik. Украина келесі жылы қорғаныс саласына 66 миллиард доллардан астам қаражат бөледі, деп мәлімдеді Украина премьер-министрі Юлия Свириденко, деп хабарлады РИА Новости.

Сәрсенбі күні Украина парламенті 1,9 триллион гривна (45 миллиард доллар) тапшылықпен елдің 2026 жылғы бюджетін қабылдады.

"Қорғаныс және қауіпсіздік — мемлекет өз кірістерінің 100%-ын қорғаныс күштеріне бөледі: әскери қызметкерлер мен олардың отбасыларын қолдау, әуе қорғанысын нығайту және дрондарды қоса алғанда, украин қаруын әзірлеу және өндіру. Келесі жылы біз армияға 2,8 триллион гривна (66,27 миллиард доллар) жұмсаймыз, бұл барлық шығынның шамамен 60%-ын құрайды", - деп жазды Свириденко өзінің Telegram арнасында.

Оның айтуынша, бюджет кірістері 2,92 триллион гривна (69,1 миллиард доллар), ал шығыстар 4,83 триллион гривна (114,3 миллиард доллар) көлемінде жоспарланып отыр.

Соңғы бірнеше жылда Украина Батыстың көмегі арқылы шығынды жабуға үміттеніп, бюджетті тапшылықпен бекітіп келеді. 2024 жылы тапшылық 43,9 миллиард долларды құрады. 2025 жылғы бюджет 37,3 миллиард доллар тапшылықпен бекітілді және әскери шығындарды арттыру үшін оған екі рет түзетулер енгізілді.

Киев бюджет тапшылығын сыртқы қаржыландырумен толтыруға тырысып жатыр. Бірақ Батыста жаңа көмек пакеттерін бөлу ұзақ талқылаулармен жүріп жатыр.