Украина дронының соққысынан кейін Ресейдің ірі зауыты Қазақстаннан газ қабылдауды тоқтатты Reuters

Украиналық дрондар Ресейдің Орынбор облысындағы ірі газ өңдеу зауытына шабуыл жасап, нысанда өрт шықты. Бұл туралы өңір губернаторы Евгений Солнцев мәлімдеді, - деп хабарлайды Aikyn.kz.

Губернатордың айтуынша, өрт зауыттың бір шеберханасында шыққан, зардап шеккендер жоқ. Ресей Төтенше жағдайлар қызметі өртті бірнеше сағаттан кейін сөндіргенін хабарлады.

Reuters мәліметінше, аталған зауытты «Газпром» компаниясы басқарады және ол Қазақстаннан жеткізілетін газды да қабылдайтын маңызды инфрақұрылым нысаны саналады. Шабуылдан кейін зауыт Қазақстаннан келетін газ ағынын уақытша тоқтатты.

Зауыттың жылдық өңдеу қуаты шамамен 45 миллиард текше метр газды құрайды.

Ресей Қорғаныс министрлігінің мәліметінше, түнде ел аумағына ұшырылған 45-ке жуық украиналық дронның бір бөлігі әуе қорғанысы арқылы жойылған.

Қазір өрттің салдары мен зауыттың жұмысына келтірілген нақты залал көлемі анықталып жатыр.