Ұлдана Мырзуанның анасы күйеу баласынан 4,5 млн теңгені не үшін алғанын айтты

АСТАНА, 20 тамыз – Sputnik. Қызметтік міндетін атқару кезінде көз жұмған фельдшер Ұлдана Мырзуанның анасы Салима Омарова сотта күйеу баласы Әділет Зейнелден 4,5 млн теңгені не үшін алғанын айтты, деп хабарлайды Sputnik Қазақстан.

"Ауылда адам өмірден өткеннен кейін апта сайын "бейсенбілік" өткіземіз. Соған қаражат керек болғандықтан, үлкен қызым 4,5 млн теңгені қарыз есебінде Әділеттен сұраған болатын. Өйткені мен жұмысқа жарамай қалдым. Мамыр айында "сол ақшаны қайтарыңдар, әйтпесе сот арқылы өндіріп аламыз" деді. Бізге ол ақшаға қызымның кредитін жабатындарын айтты", - дейді Салима Омарова.

Астанада фельдшер Ұлдана Мырзуанның өліміне қатысты іс бойынша сот процесі өтіп жатыр.

Тұрғын үйдегі мүлік иелері бірлестігінің (ОСИ) төрағасы Сәуле Жұбаниязоваға "Міндеттеріне адал қарамау" бабы бойынша айып тағылып отыр.

Еске сала кетейік, 2025 жылы 8 қарашада елордада тұрғын үй кешенінің қасбетіндегі кірпіш қаптамасы мен кондиционер қондырғысының бөлігі құлап, салдарынан бірнеше адам зардап шекті. Олардың арасында қызметтік міндетін атқаруға барған екі фельдшер болды. 23 жастағы Ұлдана Мырзуан 18 қарашада ауруханада көз жұмды.