Ұлттық ұлан жауынгері Айбат Амановты еске алуға арналған турнир өтіп жатыр

Бүгін Жезқазған қаласындағы «Жігер» спорттық-сауықтыру кешенінде ҚР ІІМ Ұлттық ұлан қызметінің үздігі және ІІІ дәрежелі «Айбын» орденінің иегері Айбат Ерболұлы Амановты еске алуға арналған бокстан ерлер мен әйелдер арасындағы І Республикалық турнир басталды, – деп хабарлайды Aikyn.kz.

Шараның ашылу салтанатында алғашқы сөзді Ұлытау облысы әкімінің орынбасары Зина Ақылбекова алып, былғары қолғап шеберлері мен жанкүйерлерді облыс орталығында тұңғыш рет өткізіліп отырған бокс додасының ашылуымен құттықтады. Зина Жұманазарқызы Ұлттық ұлан жауынгері Айбат Амановтың ерлігі мен өнегелі өмірі халық жадында мәңгі сақталады және мәртебелі спорттық шараның Ұлт ұясы -  Ұлытау жерінде алғаш рет өткізіліп отырғаны біз үшін үлкен жауапкершілік, - деді. Одан кейін өңір әкімінің орынбасары сарбаздың ата-анасына облыс әкімі Дастан Рыспековтің атынан арнайы Алғыс хатты тапсырды. Сондай-ақ әкесі Ербол Аманұлының иығына шапан жауып, анасы Гүлназ Әлкенқызына гүл шоғын сыйлады.

Өз кезегінде сөз алған Ұлттық ұлан Бас қолбасшылығы Ардагерлер кеңесі төрағасының орынбасары, запастағы полковник Қуаныш Қожахметов турнирдің Отан қорғаушы күні мен Ұлы Жеңіс күні қарсаңында өтуінің өзінде символикалық мән бар. Өйткені аға ұрпақтың даңқты жауынгерлік дәстүрін бүгінгі Ұлттық ұлан жауынгерлері лайықты жалғастыруда, - деп атап өтті.

- Мен Ұлттық ұлан Бас қолбасшылығы мен ардагерлерінің атынан Ұлытау облысы Спорт және дене шынықтыру басқармасы және облыстық Бокс федерациясына шексіз алғысымды білдіремін. Ал жарысқа қатысушыларға сенімділік пен жігер, қазақ халқына тән батырлық пен қайсарлық тілеймін. Ұлттық ұлан өз батырын ұмытпайды. Айбат мәңгілік сапта, - деді.

Турнир басталарда Айбаттың анасы Гүлназ Әлкенқызы спортшыларға сәттілік тілеп, республикалық деңгейде өткізілгелі отырған жарыстың ұйымдастырушыларына аналық алғысын білдірді.

Айбат Аманов 2003 жылдың 29 мамырда Ұлытау облысы, Жаңаарқа ауданында дүниеге келген. 2008-2018 жылдары жалпы білім беретін мектептің 9-сыныбын аяқтады. 2011 жылдан бастап бокс үйірмесіне қатысып, бокстан облыстық, республикалық жарыстарының бірнеше дүркін жеңімпазы және  жүлдегері атанды. Облыс құрама команда мүшесі болды.

2022 жылы әскер қатарына шақырылып, мерзімді қызметін Ұлттық ұланның 5514 әскери бөлімінде атқарған.  Ол әскери міндетін атқару кезінде Талдықорған қаласында орын алған Қаңтар оқиғасында конституциялық және қоғамдық тәртіпті қорғау жолында ерлікпен қаза тапты.

Мемлекет басшысының Жарлығымен әскери және қызметтік борышын орындау кезінде көрсеткен ерлігі мен жанқиярлығы үшін қатардағы жауынгер Аманов Айбат Ерболұлы ІІІ дәрежелі «Айбын» орденімен  марапатталды.

Турнирдің мақсаты –  Айбат Амановтың ерлік үлгісін дәріптеу және өскелең ұрпақ арасында боксты насихаттап, жастарды отансүйгіштік рухта тәрбиелеу болып табылады.

Жарысқа Астана, Алматы, Шымкент  қалалары мен Ақмола, Маңғыстау, Солтүстік Қазақстан, Қарағанды, Абай  және Ұлытау облыстарынан келген 100-ге жуық боксшы қатысуда.  Олар шаршы алаңда 15 дәрежедегі салмақта сынаққа түседі. Дода үш күнге созылып, ең мықты былғары қолғап шеберлерін анықтайды. Жарыстың жабылу салтанаты 9 мамыр – Жеңіс күні өтеді.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.