Ұлттық ұландағы жаңашылдық: жаңа платформа, мобильді қосымша енгізілмек

Мемлекет басшысының 2025 жылғы Жолдауында айтылған және мемлекеттік органдардың қызметіне жасанды интеллект технологияларын ауқымды енгізуге бағытталған тапсырмаларын орындау мақсатында Қазақстан Республикасы ІІМ Ұлттық ұланының Бас қолбасшылығында Ұлттық жасанды интеллект платформасымен (ҰЖИП) жұмыс істеу бойынша оқыту тренингі өтті, – деп хабарлайды Aikyn.kz ҚР ІІМ Ұлттық ұланының баспасөз қызметіне сілтеме жасап.

Сабақты өткізген "ҰАТ" АҚ жасанды интеллект департаментінің менеджері Лаура Ажбағамбетова мемлекеттік цифрлық трансформация бағдарламасы шеңберінде құрылған ҰЖИП-ның функционалдық мүмкіндігін ұсынып, Ұлттық ұлан бөлімшелерінің қызметіне ЖИ шешімдерді енгізу перспективасы туралы егжей-тегжейлі айтып берді.

Оқыту бағдарламасы платформаның негізгі модульдері: жұмыс процесіне арналған ЖИ аудармашысы, жиналыстарды автоматты түрде жазу жүйесі, ChatGPT аналогы Gemma моделімен жұмыс және ішкі процестерді автоматтандыруға арналған жеке ЖИ агенттерін құру құралдарын көрсетуді қамтыды. Барлық жұмыс пен демонстрация ақпараттық қауіпсіздіктің жоғары деңгейін қамтамасыз ететін және интернетті бұғаттайтын ЕТС-тің қорғалған жабық тізбегінде орындалды.

Болашақта бұл заманауи ЖИ-технологияларын қолданудың тиімділігін арттыруға, қызметтік ақпаратты өңдеуді жеделдетуге, басқару шешімдерінің сапасын жақсартуға және әскери бөлімшелердегі жұмыс процесін оңтайландыруға мүмкіндік береді.

Сонымен қатар, Ұлттық ұланының «Оңтүстік» өңірлік қолбасшылығына қарасты 5513 әскери бөлімінің базасында әскери тәрбиешілерге арналған «Тәрбиеші PRO» мобильді қосымшасы сынақтан өткізілді. Цифрлық өнім уақыт пен ресурсты айтарлықтай үнемдеуге, сондай-ақ Ұлттық ұлан Бас қолбасшысы генерал-майор Аңсаған Балтабековтің цифрлық технологияларды құқықтық тәртіп әскерлерінің жауынгерлік қызметіне енгізу жөніндегі тапсырмаларын жүйелі түрде орындауға бағытталған.

Жаңа құралды тәжірибеден өткізу мақсатында рота командирлерінің тәрбие және әлеуметтік-құқықтық жұмысы жөніндегі орынбасарларына салтанатты түрде планшеттер табысталды. Осы әскери қызметшілер күн сайын сабақ жоспары, конспектілер дайындауға және оқу материалдарын іздеуге уақытының көбін жұмсайтыны ескере кету керек. 

Мобильді қосымша тәрбие және оқу жұмысының барлық үдерісін жеңілдетіп, бір цифрлық кеңістікте қажетті материалдарға жылдам әрі оңай қол жеткізуді қамтамасыз етеді. Осы саланың мамандары әзірлеген барлық ақпарат біркелкі форматта ұсынады. Бұл сапа мен озық тәсілді сақтай отырып, мерзімді әскери қызметшілерді оқытуға мүмкіндік береді. Сонымен қатар қосымшаны пайдалану қағазбастылықты шамамен 70 пайызға дейін қысқартады.

Командирлердің ТжӘҚЖ жөніндегі орынбасарлары мемлекеттік-құқықтық дайындық сабақтарында инновациялық құралды офицерлер, келісім шарт бойынша әскери қызметшілер және мерзімді әскери қызметшілермен жұмыс барысында белсенді қолдана бастады. Ал Ұлттық ұланның түрлі санаттағы әскери қызметшілері үшін қосымша қызметтен тыс уақытта мемлекеттік-құқықтық дайындық тақырыптарын өз бетінше оқуға және конспект жасауға, жедел түрде құқықтық онлайн-кеңестер алуға, сондай-ақ Ұлттық ұландағы қызметті реттейтін нормативтік-құқықтық құжаттармен танысуға мүмкіндік береді.

Push-хабарламасы бар қосымшаның ыңғайлы интерфейсі екі тілде әзірленіп, планшет пен смартфонға бірдей бейімделген. Сондай-ақ конспектілер, слайдтар мен бейнематериалдарды портативті проекторлар мен Smart TV-де көрсету функциясы оқу үдерісін көрнекі әрі заманауи етеді. «Тәрбиеші PRO» мобильді қосымшасы – тәрбие жұмысын цифрландыру бағытындағы маңызды қадам. Бұл қосымшада қолайлылық, тиімділік пен бақылаудың мүмкіндіктері бірыңғай цифрлық форматқа біріктірілген.