Ұлытау облысында жер қойнауын өз бетінше игергендер жауапқа тартылды

Ұлытау облысының Мамандандырылған табиғат қорғау прокуратурасы Ұлытау ауданында пайдалы қазбаларды өз бетінше өндіру схемасын анықтады және Қылмыстық кодекстің 334-бабы бойынша 2 қылмыстық іс тіркеді, – деп хабарлайды Aikyn.kz сайты.

Тергеу нәтижесі бойынша кінәлі тұлғалар қылмыстық жауапкершілікке тартылды, 51 миллион теңге экологиялық залал өтелді, 136 миллион теңге мөлшерінде жер қойнауы ресурстарына келтірілген залалды өндіріп алу бойынша шаралар қабылдануда.

Сонымен қатар Жер кодексінің талаптарына сәйкес, пайдаланылмайтын және заңнаманы бұза отырып пайдаланылатын жерлерді анықтау қалалар мен аудандардың жергілікті атқарушы органдарының құзыретіне жатқызылған.

Алайда талдаумен жергілікті атқарушы органдардың сеніп тапсырылған аумақтарда пайдалы қазбаларды заңсыз өндірудің жолын кесу бойынша әрекетсіздік фактілері анықталды.

Тек «Қазақстан Ғарыш сапары» ғарыштық мониторингінің деректері бойынша (nedro.gharysh.kz), облыс аумағында пайдалы қазбаларды өз бетінше өндіру белгілері бар 53 учаске белгіленген.

Осыған байланысты Табиғат қорғау прокуратурасының ұсынуы бойынша, облыс әкімдігі қалалар мен аудандардың әкімдеріне пайдалы қазбаларды өз бетінше өндіру фактілерін уақытылы анықтауға бағытталған шараларды қабылдауды тапсырды.

Жергілікті атқарушы органдардың кінәлі лауазымды адамдары тәртіптік жауапкершілікке тартылды.

Жер қойнауын өз бетінше пайдалану фактілерін анықтау және жолын кесу жұмыстары жалғасуда және Табиғат қорғау прокуратурасының бақылауында.