Ұлытаулық 76 жастағы ақсақал Парижге жаяу барып, марапатқа ие болды

Парижге жаяу жеткен 76 жастағы қазақстандық саяхатшы Сәрсенбай Қотырашов құрметті марапатқа ие болды, деп хабарлайды Tengri Travel тілшісі Туризм және спорт министрлігіне сілтеме жасап.

Парижге жаяу жеткен 76 жастағы қазақстандық саяхатшы Сәрсенбай Қотырашов құрметті марапатқа ие болды, деп хабарлайды Tengri Travel тілшісі Туризм және спорт министрлігіне сілтеме жасап.

Бұған дейін желіде Ulytauman деген атпен танымал Сәрсенбай Қотырашов кезекті марафонын аяқтаған болатын. 2026 жылдың 3 наурызынан бастап ақсақал Сербия, Мажарстан, Аустрия, Германия және Францияны жаяу жүріп өтті.

53 күн ішінде ол үш мың шақырымға жуық жолды еңсерді. Парижде оны дипломаттар мен ЮНЕСКО өкілдері қарсы алды. Сапар оңай болған жоқ: автобанмен жүруге тыйым салынғандықтан, саяхатшыға жолсыз жерлермен және велосипед соқпақтарымен жүруге тура келді. Ауырлыққа тіпті оның чемодан тиелген арбасы шыдас бермеді, бірақ ақсақалдың өзі межелі жерге жетті.

Туризм және спорт вице-министрі Серік Жарасбаев белгілі саяхатшы, туризм саласының еңбек сіңірген қайраткері Сәрсенбай Қотырашовқа "Құрметті спорт қызметкері" атағын табыстады.

Министрлік 2022 жылы саяхатшы 72 жасында Қазақстанның 17 облысын жаяу аралап, 8 мың шақырым жол жүргенін атап өтті. Осы жетістігі үшін КИнЭС отандық рекордтар кітабына енген.

"Кейінгі жылдары да ол халықаралық деңгейдегі жаяу саяхаттарын жалғастырып келеді. 2023 жылы Атыраудан жолға шығып, Кавказ өңірі мен Грузия арқылы Түркияның Стамбул қаласына жетті. Ал 2024 жылы Өскеменнен бастап Алтай, Моңғолия арқылы Қытай астанасы Бейжіңге дейін барды", – деп хабарлады Туризм министрлігі.

Бұған дейін 2027 жылы Сәрсенбай Қотырашовтың АҚШ-қа саяхат жасап, онда Атлант мұхитынан Тынық мұхиты жағалауына дейін сегіз штатты жаяу аралауды жоспарлап отырғаны хабарланған еді. Ол қазақстандықтарға күн сайын жаяу жүруге және өз-өзін үнемі дамып, өз күшіне сенуге кеңес береді.

Тағы оқыңыз: Ұлытаулық ақсақал Парижге дейін үш мың шақырымға жуық жолды жаяу жүріп өтті

Google News арқылы жаңалықтарымызды қадағалаңыз