“Ұмай” әйелдер ипотекасын іске қосу мерзімі аталды

Қазақстанда танымал "Ұмай" әйелдер ипотекасы тамыз соңына дейін іске қосылады. Бұл туралы Үкімет отырысының қорытындысы бойынша өткен брифингте "Отбасы банк" басшысы Ләззат Ибрагимова мәлімдеді, деп хабарлайды Tengrinews.kz тілшісі.

Брифинг барысында журналистер Ибрагимовадан аталған бағдарлама бойынша өтінімдерді қабылдау нақты қашан басталатынын сұрады.

"Биыл "Ұмай" әйелдер ипотекасы тамыздың соңғы күндеріне дейін іске қосылады", - деді Ибрагимова.

Оның айтуынша, банк бағдарламаны жүзеге асыру үшін Азия даму банкі (АДБ) ұсынатын қаражаттың болжамды құнын айқындап қойған.

Тікелей "Отбасы банк" қаржыландыратын тұрғын үй бағдарламаларына қарағанда, "Ұмай" тартылған қаражат есебінен қарыз беруді көздейді. Ипотека баспана алғысы келетін әйелдерге арналған.

Бұл ретте жылжымайтын мүлік түріне қатысты шектеулер жоқ - жаңа салынған үйден де, қайталама нарықтан да пәтер сатып алуға болады.

"Бұл мемлекеттік бағдарлама емес", - деп атап өтті банк басшысы.

Қатысудың негізгі шарттарының бірі - қолданыстағы тұрғын үй депозитінің болуы және оның жинақталу мерзімі. Сондықтан банк бұған дейін бағдарламаға қызығушылық танытқан әйелдерге депозитті алдын ала ашуға кеңес берген болатын.

Ибрагимова бұл өнімге деген сұраныстың жоғары екенін айтты. Болашақ қарыз алушылар үшін алдын ала қарыз беру механизмі де жоспарланып отыр. "Отбасы банк" басшысының сөзінше, қазіргі уақытта автоматтандырылған процестерді дайындау жұмыстары аяқталып жатыр.

"Қазір автоматтандыру процестерінің бәрі дайын деп ойлаймын. Шамамен екі аптадан кейін бағдарламаның басталуы туралы жақсы жаңалықтар болады", - деді Ибрагимова.

"Ұмай" ипотекасының шарттары

"Ұмай" әйелдер ипотекасы бойынша келесі пәтерлерді сатып алуға болады:

алғашқы нарықтан; қазақстандық тұрғын үй компаниясының кепілдігімен немесе сақтандыру құралын пайдалана отырып, үлестік қатысу шарты бойынша құрылыс сатысындағы үйлерден; қайталама нарықтан, егер үй 2016 жылдан ерте салынбаған болса.

Әйелдер ипотекасының шарттары:

Алғашқы жарна - ірі қалаларда 20 пайыздан, өңірлерде 15 пайыздан басталады. Қарыздың максималды сомасы - 50 миллион теңгеге дейін. Несие мерзімі - 6 айдан 10 жылға дейін. Алғашқы жарна үшін зейнетақы жинақтарын пайдалануға болады. Екі ортақ қарыз алушыға дейін тартуға болады.

Тағы оқыңыз: 50 миллионға дейін және конкурсыз: Қазақстанда танымал ипотека қайта іске қосылады

Google News арқылы жаңалықтарымызды қадағалаңыз

Жазылу