Университет пен мектепте жазба жұмыстары аудиторияда оқытушының қатаң бақылауымен өте бастады

Gizmodo.com сайтына сілтеме жасаған Aikyn.kz танымал тұлғаның чат-ботқа неге ренжігенін түсіндіреді.

Ким Кардашьян baby bar емтиханын бірнеше рет тапсырып, тек 2021 жылы одан сәтті өткен. Фото nypost.com сайтынан алынды. Авторлығы: kimkardashian/Instagram

Ким Кардашьян чат-ботқа сенемін деп, заңгерлік тестерден үнемі сүрінетінін айтқан. Осы аптада жарияланған Vanity Fair-дің жаңа видеосында Ким Кардашьяннан жасанды интеллект қолдануы туралы сұралды. Реалити-шоу жұлдызы тестерге дайындық кезінде ChatGPT өзіне қате жауаптар бергенін айтып, оны айыптаған.

Кардашьян 2019 жылдан бері заң саласына өз бетінше дайындалып жүр. 2021 жылы ол «baby bar» деп аталатын алғашқы межелік емтиханнан өтті. Entertainment Weekly дерегінше, ол мамырда заң білімін тәмамдап, шілдеде адвокаттық емтихан тапсырған, қазір нәтижесін күтуде.

Ким Кардашьян дәстүрлі университеттің заң мектебіне бармай, тәжірибелі адвокаттармен жұмыс істейтін шәкірттік бағдарлама арқылы заңгер болуға дайындалып жүр. Сол себепті ол baby bar емтиханын бірнеше рет тапсырып, ақыры 2021 жылы одан сәтті өткен. «Baby bar» – бұл заңгер болуды дәстүрлі емес тәсілмен таңдаған адамдар тапсыратын бастапқы үлкен емтихан.

Актриса YouTube-тағы Vanity Fair видеосының бір эпизодында ChatGPT қолданғанын айтады. Жасанды интеллекті «дос» санайсың ба?» деген сұрауға Кардашьян: «Жоқ. Мен оны құқықтық кеңестер үшін қолданамын. Маған бір сұрақтың жауабы керек болса, суретке түсіріп, одан сұраймын», – деп жауап берген.

Жүргізуші әзілдеп, бұл «көшіру» емес пе деп сұрағанда, Кардашьян бұл тек тестке дайындық екенін, бірақ бағдарлама жиі қателесетінін түсіндіреді:

«Олар үнемі қателеседі. Соның кесірінен мен тестерді қайта-қайта құлаттым. Сосын ашуланып, «сенің кесіріңнен құладым, неге бұлай істедің» деп оған айқайлаймын да».

Кардашьян ChatGPT-ден «мені сәтсіздікке ұшыраттың, енді өзіңді қалай сезінесің» деп сұрағанда ақылды чат-бот: «Бұл саған ішкі түйсігіңе сенуді үйретеді. Сен жауапты бұған дейін де білдің» деп жауап берген.

Ия, қиялға шомып, елеске берілген (галлюцинацияға) генеративті ЖИ мағынасыз жауап беруге бейім. Технология шын мәнінде не айтып тұрғанын «түсінбейді». Оның жауабы көбіне қисынды естілуі мүмкін. Бірақ шынтуайтында ол сөздерді бірінен соң бірін қисынды тіркеп, сізге ұсынады. Әдемі оқылуы, естілуі мүмкін. Бірақ бұл алдамшы сезім.

Сондықтан «Кардашьяндар әулеті» атты реалити-шоудың жұлдызы Ким чат-ботты «қас дұшпан» немесе «улы дос» деп санайтынын мойындаған.

«Олар өз жұмысын жақсырақ істеуі керек. Өйткені мен олардан көмек сұраймын. Ал олар маған өмір сүруді үйреткісі келеді. Психотерапевт сияқты менің неге өзіме сенуім керектігін түсіндіреді. Өздері жауапты қате береді. Мен үнемі скриншот жасап (чат-боттың жауаптарын – авт.), оны достарым отырған топтық чатқа жіберемін. Және: «Мынаның маған осылай сөйлегеніне сенесіңдер ме? Бұл жындылық қой!» деп жазамын», – дейді актриса.

Жастардың арасында өте танымал жұлдыздың оқиғасы жасанды интеллектке толықтай сенудің шектеулерін көрсетеді. Технология пайдалы болуы мүмкін, бірақ оның қателеспейтініне ешкім кепілдік бере алмайды. Кимнің мысалы адамдарға өз білімін тексеру мен сыни ойлаудың әлі де маңызды екенін еске салады.

«Селебретилер» өмірінен эпизод мына видеода: 

Ким Кардашьян – америкалық тележұлдыз, кәсіпкер, продюсер және мәдени ықпалы өте жоғары танымал тұлға. Ол Keeping Up with the Kardashians атты реалити-шоу арқылы бүкіл әлемге әйгілі болды. Кейін косметика (KKW Beauty, SKKN), киім және shaping–киім бренді (SKIMS) сияқты табысты бизнес жобаларын қолға алды.

Соңғы жылдары Ким құқықтық реформалар мен адвокатураға назар аударып, түрме жүйесіндегі әділетсіздікке қарсы науқандарға қатысып келеді және заң саласына ресми түрде қадам жасап жатыр.

Ким Кардашьянның мысалында ChatGPT-ке толық сүйенуге болмайтынын көреміз. Оның жауаптарын ой елегінен өткізіп, тексеріп отыру керек. Орта білім саласында оны оқушыларға қолдануға мүлдем тыйым салу керек. Осы себепті әлемдегі жоғары, орта білім беру ұйымдары соңғы кездері жазба жұмыстарын аудиторияда профессор немесе оқытушының бақылауымен, қатаң прокторингпен орындауға ауыса бастады. 

Бұндай жағдайда смартфондарын тапсырған оқушылар өзінің біліміне ғана сүйенуге мәжбүр болады. Осындай білім тексеру формалары академиялық адалдық пен нағыз білім беру үшін қажетті шаралар деп ойлаймыз.

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.