ҰҚТ мен күрес және кадрларды даярлау Қазақстан ІІМ ФТБ мен ынтымақтастықты кеңейтеді

Қазақстанның Ішкі істер министрі Ержан Сәденов Нью-Йоркте өткен БҰҰ-ның Полиция саммитінде сөз сөйлеп, АҚШ-тың құқық қорғау органдары басшыларымен кездесті, деп хабарлайды Tengrinews.kz тілшісі Polisia.kz-ке сілтеме жасап.

Пленарлық отырыстағы баяндамасында ІІМ басшысы Қазақстанның халықаралық қауіпсіздікті нығайту, полиция бітімгершілігін дамыту, сондай-ақ трансұлттық ұйымдасқан қылмыс пен киберқылмысқа қарсы іс-қимыл бағытында атқарып жатқан жұмыстары туралы айтты. Сонымен қатар Сәденов әртүрлі елдердің құқық қорғау органдары арасындағы практикалық іс-қимылды кеңейтудің, тәжірибе алмасудың және қазіргі заманғы қауіп-қатерлерге қарсы тұрудағы бірлескен жұмыстың маңыздылығын атап өтті.

Фото: ҚР ІІМ баспасөз қызметі

Саммит аясында министр БҰҰ Бас хатшысының орынбасары Жан-Пьер Лакруамен кездесті. Тараптар Қазақстанның БҰҰ бітімгершілік қызметіне қатысуын кеңейту, полиция контингенттерін даярлау, ішкі істер органдарының жұмысына заманауи цифрлық шешімдерді енгізу және Біріккен Ұлттар Ұйымымен ынтымақтастықты одан әрі дамыту мәселелерін талқылады. Келіссөздер қорытындысы бойынша осы бағыттардағы өзара іс-қимылды жалғастыру туралы уағдаластықтарға қол жеткізілді.

Фото: ҚР ІІМ баспасөз қызметі

Сонымен қатар ІІМ басшысы АҚШ-тың Федералды тергеу бюросымен (ФБР) ынтымақтастық мәселелерін талқылады. ФБР-дың Нью-Йорктегі кеңсесінің басшысы Джеймс Барнаклмен келіссөздер барысында ұйымдасқан қылмысқа және киберқылмысқа қарсы күрестегі өзара іс-қимылды кеңейту перспективалары, цифрлық технологиялар мен мамандарды даярлау саласындағы тәжірибе алмасу мәселелері көтерілді. Сонымен қатар Қазақстан делегациясы дағдарыстық жағдайларға ден қою кезінде ведомствоаралық үйлестіруді қамтамасыз ететін ФБР-дың Бірлескен операциялық орталығында болды.

Сапар барысында қазақстандық тарап Нью-Йорк полиция департаменті Жедел басқару орталығының жұмысымен танысты. Онда мегаполис полициясы күштерін басқару практикасы, бейнебақылау жүйелерінің мүмкіндіктері, цифрлық талдау және патрульдік бөліністерді нақты уақыт режимінде үйлестіру жұмыстары көрсетілді.

Фото: ҚР ІІМ баспасөз қызметі

БҰҰ Полиция саммиті Қазақстан ІІМ басшысы үшін басқа мемлекеттердің құқық қорғау органдарының басшыларымен бірқатар жұмыс кездесулерін өткізу алаңына айналды. Келіссөздер барысында тараптар екіжақты ынтымақтастықты кеңейту, тәжірибе алмасу және қазіргі заманғы сын-қатерлер мен қауіптерге қарсы іс-қимыл саласындағы өзара іс-қимыл перспективаларын талқылады.