Үш мың ауыл жоғары жылдамдықты интернетке қосылады. LIVE

Алдағы екі жылда 3 мыңнан астам ауыл жоғары жылдамдықты интернетке қосылады. Ол үшін арнайы жер бөлініп, оптикалық құрылғылар орнатылады. 

Осылайша, халықтың 99%-ы интернетпен қамтылады. Жалпы елде 6 мыңнан астам ауылдық елді мекен бар.

Бұл туралы Үкімет отырысында Жасанды интеллект министрі Жаслан Мадиев мәлімдеді. Ведомство жаңа жылда тағы қандай  жобаларды іске қосады? 

Ауылдарға интернет тартумен қатар ауылдағы әрбір үйге талшықты-оптикалық желі салу қолға алынған. Ол «Соңғы миль» деп аталады. Осы жоба аясында 400 мыңдай үй шаруашылығына оптика құрылысын жүргізу көзделіп отыр.

Бұдан бөлек, ұзақ жол жүретін қазақстандықтар үшін жақсы жаңалық. Осы жылы Қазақстан Теміржолы пойыздары мен Air Astana ұшақтарында спутниктік интернет қолжетімді болады. Бұл бағытта белсенді жұмыс жүргізіліп жатқаны аталып өтті.

Сондай-ақ өткен жылды қорытындылаған министр ІТ нарық 2 трлн теңге табыс әкелгенін атап өтті. Алдағы уақытта бұл сан өсе береді. Жалпы Астана хаб стартаптары мен ІТ компаниялары экономикаға 900 млн доллар инвестиция салды. Саланы қолдау күшейді. Әсіресе стартаптарды бастапқы сатысында ғана емес, әрі қарай іске асыру жолында қаржыландыру тетіктері қолға алынған.