Үш мыңнан астам адам ән орындайды: Шығыс Қазақстан Гиннес рекордтар кітабына енуі мүмкін

АСТАНА, 12 наурыз – Sputnik. Шығыс Қазақстан облысының тұрғындары Гиннес рекордтар кітабына енуге дайындалып жатыр, деп хабарлады облыстық әкімдік.

Тұрғындар Өскемен қаласында Наурыз мерекесін тойлау кезінде ерекше рекорд орнатуға дайындық жүргізіп жатыр.

"Жоспар бойынша, үш мыңнан астам адам бір мезгілде домбырада қазақтың "Ақ бұлақ" әнін орындайды", - деді Өңірлік коммуникациялар қызметіндегі брифингте қала әкімінің орынбасары Болатбек Мамарбаев.

Әнді орындау 22 наурыз күні сағат 9:00-де қаланың орталық алаңында өтеді. Арнайы комиссия келіп, нәтижені тіркеп, кейін Guinness World Records-қа өтінім беру үшін рәсімдейді.

Акцияға кез келген шығысқазақстандық қатыса алады. Ол үшін 21 наурыз күні сағат 15:00-де орталық алаңда болатын дайындыққа келу қажет. Қатысушыларға қойылатын талап - ұлттық киім кию, әннің сөздері мен әуенін алдын ала жаттау.