Үшжақты комиссия отырысы: әлеуметтік әріптестік және еңбек қатынастары

Елде өндірістегі қауіпсіздік талаптарының сақталуына бақылау күшейеді. Республикалық үшжақты комиссияның отырысында Премьер-Министрдің орынбасары, Мәдениет және ақпарат министрі Аида Балаева бірлескен рейдтер жүргізуді тапсырды. 

Тексеріске мемлекеттік органдармен бірге, кәсіподақтар, азаматтық сектор және қоғамдық ұйым өкілдері қатысады. Жалпы елде еңбек заңнамасын жетілдіру, жұмыспен қамту және еңбек қауіпсіздігін арттыру бағытындағы жұмыстар жалғасуда. Еңбек тәуекелдерін бақылау және жұмыскерлердің құқықтарын қорғау үшін цифрлық құралдар енгізіліп жатыр.

Сонымен қатар Enbek.kz платформасында студенттік тәжірибені ұйымдастырудың бірыңғай цифрлық тетігі іске қосылды. Ол жастарды, оқу орындарын және жұмыс берушілерді онлайн форматта біріктіреді. Жаңа механизм білім беруді еңбек нарығының нақты қажеттіліктерімен байланыстырып, түлектердің жұмысқа орналасу мүмкіндігін арттырады.

Жиын соңында Аида Балаева колледждерде кадр даярлау жүйесін еңбек нарығының қажеттіліктеріне сай ескере отырып, талдауға назар аударды. Сондай-ақ кәсіпорындар арасында ауқымды сауалнама жүргізіледі. Ол кадр тапшылығы бар салаларды, зейнет жасына жақындап қалған қызметкерлер санын және жойылуы мүмкін мамандықтарды анықтауға мүмкіндік береді. Тиісінше, колледждер мен жоғары оқу орындарының жұмысын экономиканың нақты сұраныстарына бейімдеуге жол ашады.