Венгрия премьер министрі Орбан сайлауда жеңілгенін мойындады

Виктор Орбан Венгриядағы парламенттік сайлауда жеңілгенін мойындап, бұдан былай «оппозицияда жүріп елге қызмет етуге» уәде берді. Петер Мадьяр бастаған «Тиса» партиясы жаңа парламенттегі дауыстардың үштен екісіне ие болуы мүмкін, деп хабарлайды dw.com.

Венгрия премьер-министрі Виктор Орбан жеңіліс тапқанын жексенбі, 12 сәуір күні кешке Будапештегі жақтастарының алдында мәлімдеді.

«Не болса да, біз тіпті оппозицияда болсақ та елге қызмет ететін боламыз. Міндет айқын: енді басқару жүгі біздің иығымызда емес кезде, біз өз қоғамымызды нығайтуымыз керек», — деді Орбан.

Сайлау комиссиясының сайлау учаскелерінің 84,91%-ы бойынша есептелген мәліметіне сәйкес, оппозиция көшбасшысы Петер Мадьяр мен оның оңшыл-центристік «Тиса» партиясы 199 орынның 138-іне ие болуы мүмкін. Бұл жаңа парламенттегі дауыстардың үштен екісінен астамы (конституциялық көпшілік).

Сайлаушылардың келуі рекордтық деңгейге жетті: учаскелер жабылуға жарты сағат қалғанда бұл көрсеткіш 77,8 пайызды құрады. 12 сәуірде Мадьяр Орбанның телефон арқылы хабарласып, оны жеңісімен құттықтағанын хабарлады.

Орбан мен Мадьярдың текетіресі

62 жастағы Виктор Орбан 2010 жылдан бері билікте болды. Бұл сайлауда алғаш рет оны жеңе алатын оппозициялық кандидат — 45 жастағы Петер Мадьяр пайда болды. Мадьяр бұрын Орбанның «Фидес» партиясының жастар қанатында болған, ал «Тиса» партиясын небәрі екі жыл бұрын басқарған еді.

Орбан үкіметіне көңілі толмайтын азаматтар елдегі қоғамдық инфрақұрылымның, денсаулық сақтау және білім беру жүйесінің нашарлауын, сондай-ақ сыбайлас жемқорлықты басты мәселе ретінде атайды. Мадьяр өз кезегінде жемқорлықпен қатаң күресуге, «жүйелі өзгерістер» жасауға және жаңа конституцияны ұсынуға ниетті. Сонымен қатар, ол Венгрияның Ресейден іргесін аулақ салып, НАТО-ның сенімді одақтасы ретінде Еуроодаққа толыққанды оралуын жақтайды.

Бүгін, 09:44