Венгрия Украинаны қаржыландыруға бір тиын да жұмсамайды Сийярто

АСТАНА, 16 желтоқсан – Sputnik. Венгрия Украинаны қаржыландыруға өз ақшасын жұмсауға дайын емес және Ресейдің бұғатталған активтерін тәркілеуге қарсы, деп мәлімдеді Венгрияның сыртқы істер министрі Петер Сийярто.

Оның айтуынша, Еуроодақ Ресейдің бұғатталған активтері есебінен Украинаға 200 миллиард еуродан астам қаржы бергелі отыр, оның жартысынан көбі Украина армиясын қаржыландыруға жұмсалуға тиіс.

"Мемлекеттік жемқорлық деңгейі шектен тыс жоғары, әскери мафия билік жүргізетін әрі НАТО-ға мүше емес елге ақша жіберу — бұл Венгрияның мүдделеріне толықтай қайшы, ұлттық қауіпсіздік мүдделеріне де мүлде сәйкес келмейді. Мен кеше ашық айттым: біз, венгрлер, Украинаға венгр халқының бір тиынын да жұмсауға дайын емеспіз. Украина мемлекетінің жұмыс істеуіне де, әскерді қаруландыруға да, соғысқа да ақша бөлмейміз", — деді Сийярто "Шындық сағаты" бағдарламасының эфирінде.

Еурокомиссия Ресейдің егемен активтерін Киев үшін пайдалануға Еуроодақ елдерінің келісім алуға тырысып жатыр. Украинаға 185 миллиард еуродан 210 миллиард еуроға дейінгі соманы несие түрінде беру мәселесі талқыланып жатыр, оны Украина қақтығыс аяқталғаннан кейін және "Мәскеу материалдық шығынды өтеген жағдайда" қайтаруға тиіс болады.

Ал Ресей Сыртқы істер министрлігі Еуроодақтың Ресей Украинаға репарация төлеуі керек деген идеялары шындықтан алшақ екенін, Брюссельдің бұрыннан Ресей активтерін ұрлаумен айналысып келе жатқанын мәлімдеді.