Заңсыз несие беру арқылы 1 млрд теңгеден астам пайда көрген қостанайлық сотталды

АСТАНА, 6 тамыз – Sputnik. Қостанайда заңсыз микрокаржылық қызмет ұйымдастырған ер адамға қатысты сот үкімі шықты, деп хабарлайды Sputnik Қазақстан.

Тергеу материалдарына сәйкес, қала тұрғыны өз қызметін OLX және Instagram арқылы жарнамалаған. Заңды лицензиясы да болмаған. Соған қарамастан, мүлікті кепілге алып, ақшаны қарызға берген.

"Азаматтардың ауыр материалдық жағдайын және екінші деңгейлі банктерден несие ала алмауын пайдаланған ол жылдық мөлшерлемесі 120%-ға дейін жететін жоғары пайызбен қарыз беріп отырған. Сонымен қатар, нотариат куәландырған шарттарда қарыздың нақты сомасы емес, алдын ала есептелген сыйақы, рәсімдеу шығындары және өзге де төлемдер қосылғандықтан, негізсіз ұлғайтылған сома көрсетілген", - делінген ресми хабарламада.

Жәбірленушілердің біреуі 9 млн теңгені қарызға алған. Бірақ шартта 14 млн теңге көрсетілген. Артынан 18 млн теңге көлеміндегі тағы бір қарыз рәсімделген. Бірақ осы шарт бойынша ешқандай ақша берілмеген. Ал кредитор келісімшартты негізге ала отырып, сот шешімімен жәбірленушіден 26 млн теңге өндіріп алған. Осылайша, 50-ден астам адам тиімсіз шарттармен қарызға ақша алған.

Қылмыстық жолмен алынған кірісітің жалпы сомасы 1 млрд теңгеден асқан. Сот үкімімен қала тұрғыны 2 жыл 8 ай мерзімге бас бостандығынан айырылды.

Сонымен қатар, заңсыз ақшаға сатып алынған төрт пәтер, екі жер учаскесі, Mercedes-Benz G500, Dodge RAM 1500 және Hyundai Santa Fe автокөліктері мемлекет кірісіне тәркіленді.

Үкім заңды күшіне енген жоқ.