Қазақстанда дропперлер арқылы 112 млрд теңгеден астам заңсыз операциялар жүргізілген

Фото: freepik.com

Қылмыстық схемаларды ұйымдастырған 40-тан астам адам анықталып, заңсыз әрекетке 500-ден астам азаматтың тартылғаны белгілі болды.

Дропперлердің банктік шоттары арқылы жалпы сомасы 112 млрд теңгеден астам заңсыз қаржылық операциялар жүргізілген. 

Тек соңғы екі айдың өзінде 1 000-нан астам дроп-карта бұғатталды. Мәселен, ҚМА Батыс Қазақстан облысы бойынша департаменті интернет-алаяқтықтан түскен қаражатты заңдастыру үшін азаматтардың банк шоттарын пайдаланған халықаралық «дроповодтар» желісінің қызметін тоқтатты.

Банк шотын есірткі сатушыларға берген 10 дропперге қатысты қылмыстық іс қозғалды

«Тергеу амалдарына сай, бұғатталған шоттар арқылы шамамен 17 млн теңге өткізілген. Кейін ұйымдасқан топ мүшелері шот иесі болған 18 жастағы азаматты күштеп ұстап, күш қолданамыз деп қорқытып, банктік шоттарға қолжетімділікті қалпына келтіруге мәжбүрлеген», делінген ақпаратта.

Осыған ұқсас схема Жетісу облысында да анықталды.

«Әлеуметтік желідегі жұмыс туралы хабарландыруға сенген жергілікті тұрғын кураторлардың нұсқауымен интернет-алаяқтықтан түскен қаражатты өзінің банктік шоттары арқылы қабылдап отырған. Кейін қаражатты криптовалютаға айырбастап, ұйымдастырушылардың шоттарына аударып, әр операциядан комиссия алып отырған», деп жазады агенттік.

Батыс Қазақстанда 7 студент алаяқтарға көмектескені үшін сотталды

Түркістан облысында дропперлік схема Telegram мессенджеріндегі жасырын куратор арқылы басқарылған.

«Ол студенттер мен кәмелетке толмағандарға сыйақы ұсынып, интернет-банкингке қолжетімділікті беруге көндірген. Соның салдарынан 20-дан астам жас тергеуге тартылды», делінген ақпаратта.

Қаржылық мониторинг агенттігі дропперлік схемаларға қатысу қылмыстық жауапкершілікке әкеп соғатынын ескертті. Елдің қаржылық қауіпсіздігі әр азаматтың жеке жауапкершілігінен басталады.

Айта кетейік, Петропавлда 120 млн теңгені қолды қылған дропперлер сотталды. Сот барысында бұл топтың 2023 жылдан бері әрекет еткендігі және олар 20 адамның 120 млн теңге ақшасының қолды болуына жағдай жасағаны анықталды.

Еске сала кетейік, Астанада жұмбақ жағдайда қаза тапқан Айсәуле Қанахаға қатысты қылмыстық іс аясында жәбірленушінің алаяқтарға ақша аударған кезде пайдаланылған дропперлер анықталып, олардан жауап алынған болатын.