Зейнетақы қоры ақшасының есебінен тіс емдеуге тыйым салынады

Қыркүйекте Атырау облысында «Бірыңғай жинақтаушы зейнетақы қорынан» қаражатты заңсыз алуға араласқан 5 қылмыстық топ ұсталды.

Қаржылық мониторинг агенттігі мәліметіне сәйкес,олар 30-дан астам жалған стоматологиялық клиниканы пайдаланған. Бұл мекемелер тек қағаз жүзінде қызмет істегендіктен, ғимараттары да, жабдықтары да, білікті қызметкерлері де болмағаны анықталып отыр. Ал жалған медициналық құжаттарды рәсімдегені үшін күдіктілер азаматтардан 10%-дан 20%-ға дейін заңсыз сыйақы алып келген. Сонымен қатар қылмыстық топ 226 дроппердің көмегімен 200 млрд теңгеден астам қаржыны қолма-қол ақшаға айналдырған.

Ернар Тайжан, ҚМА ресми өкілі:

- Зейнетақы салымшыларының ақшасына күдіктілер 15 қымбат автокөлік, зергерлік бұйымдар, коммерциялық нысандар, пәтерлер мен жер телімдерін сатып алған. Қылмыстық жолмен табылған мүлікті іздестіру жалғасуда. Қазіргі уақытта 59 тінту жүргізілді. 10 адамға қатысты бұлтартпау шарасы қолданылады. 

Қазір осы іс бойынша іздеуде жүрген үш күдіктінің біреуі ұсталды. Ал өзі жинаған зейнетақысын осындай жолмен шығарып алған азаматтар қылмыстық жауапкершілікке тартылмайды. Дегенмен, министрлік жинақтарды стоматологиялық қызметтерге пайдалануға тыйым салуды ұсынды. Бұған дейін уақытша ғана, яғни 2025 жылдың 15 қыркүйегінен 2026 жылдың 15 сәуіріне дейін күшінде болады делінген еді. Алайда енді ол тұрақты ереже ретінде енгізілмек.

Ләззат Ибрагимова, «Отбасы банк» АҚ Басқарма төрағасы:

- Былтырдан бері біз стоматологтар қауымдастығымен келіссөз жүргіздік. Денсаулық сақтау министрлігімен де байланыста болдық. Біз бірқатар ұсыныс айттық, алайда олар орындалған жоқ. Портал арқылы өткен қаражаттың 35 пайызы 20 тіс емдеу клиникасына түсіп отырған. Міне біздің күдікке ілінгендер осылар болды. Олардың лицензиясы жыл соңында ғана алынған. 6 айда ол сондай абырой жинап, 20 млрд теңгеге қызмет көрсетуі күмән тудырды. Олар айына 2,5 млрд теңгеге қызмет көрсетуі үшін жабдық пен стоматолог дәрілерлердің саны айтарлықтай болуы керек. Ал түскен салық көлемі оны ақтамады.