Зейнеткер үйін сатып, ақшасын курьерге тапсырған. Киберполицейлер алаяқты ұстады

Астаналық киберполицейлер 87 жастағы зейнеткердің 39 миллион теңгесін алаяқтардан сақтап қалды, деп хабарлайды Arasha.kz.

Оқиға биыл тамыз айында орын алған. Белгісіз адамдар мессенджер арқылы зейнеткермен хабарласып, өздерін полиция мен Ұлттық банктің қызметкерлері ретінде таныстырған. Олар қарияға "пәтеріңізді бөтен адамдар өз атына рәсімдеп, сатпақ" деп сендіріп, "мүлкіңізді сақтау үшін пәтерді сатып, ақшаны қауіпсіз есепшотқа аудару қажет" деген жалған ақпарат таратқан.

Алаяқтар тіпті "құпия операция жүріп жатыр" деп айтып, ешкімге тіс жармауын талап еткен. Зейнеткер олардың сөзіне сеніп, риэлторлық компания арқылы пәтерін сатып, 39 миллион теңгені курьерге қолма-қол берген.

Тергеу барысында полиция қызметкерлері күдіктіні анықтап, 23 жастағы ер адамды ұстады. Одан ұрланған ақша толық көлемде тәркіленіп, иесіне қайтарылды. Қазір ол Астана қаласы полиция департаментінің уақытша ұстау изоляторында қамауда отыр.

Қылмыс фактісі бойынша Қылмыстық кодекстің 190-бабы ("Алаяқтық") аясында тергеу амалдары жүргізілуде.

Полиция биыл елордада үш мыңнан астам интернет-алаяқтық тіркелгенін мәлімдеді. Мұндай қылмыстардың негізгі нысанасы — 50 жастан асқан азаматтар. Мамандардың айтуынша, көп жағдайда олар қаржылық сауаттылықтың төмендігінен алаяқтардың құрбанына айналады.

Құқық қорғаушылар тұрғындарды сақ болуға, күмәнді қоңыраулар мен хабарламаларға сенбеуге шақырады. Полиция ешқашан мүлікті сатуды, несие рәсімдеуді немесе ақшаны “қауіпсіз есепшотқа” аударуды сұрамайды. Осындай жағдай туындаса, әңгімені дереу тоқтатып, ең жақын полиция бөлімшесіне хабарласу қажет.