Жамбыл облысында аштан өлген есектер ісі бойынша фермерге айыппұл салынды

АШМ Ветеринариялық бақылау және қадағалау комитеті облыстық аумақтық инспекциясының мәліметінше, «Ауыл шаруашылығы жануарларын сәйкестендіру» ақпараттық жүйесінде есектердің иесі ретінде Жамаш Тұрлыбек тіркелген. Оның иелігінде 2 443 бас есек бар.

Бұған дейін де ветеринариялық талаптарды бұзғаны үшін әкімшілік жауапкершілікке тартылған кәсіпкер тағы да тексеріс нәтижесінде айыппұлға ілікті. Малды күтіп-бағу және сәйкестендіру ережелерін бұзғаны үшін оған 98 300 теңге, ал келесі күні ветеринариялық-санитариялық нормаларды сақтамау және есеп үшін деректерді бермеу фактілері бойынша тағы да 98 300 теңге айыппұл салынды.

Сонымен қатар Темірбек ауылдық округінің ветеринарлық дәрігерінен жануарларды сәйкестендіру жұмыстарын дер кезінде ұйымдастырмағаны үшін түсініктеме алынды. 24 қазанда оған да Әкімшілік құқық бұзушылық туралы кодекстің 406-бабының 5-тармағы бойынша 49 150 теңге көлемінде айыппұл салынған.

Мамандардың мәліметінше, Темірбек ауылдық округі аумағында соңғы үш жылда жануарлардың аса қауіпті аурулары тіркелмеген. 2025 жылға арналған ветеринариялық-профилактикалық іс-шаралар бекітілген жоспарға сай жүргізіліп жатыр. Өткен аптада алынған зертханалық сынамалардың нәтижелері әзірге дайын емес.

Бұған дейін жергілікті тұрғындар бірнеше ай бойы округ аумағындағы есектерді басқа жерге көшіруді талап еткен болатын. Байзақ ауданы әкімдігі бұл мәселе шешіле бастағанын хабарлады.

«25 қазан, сенбі күні Темірбек ауылдық округі маңында ұсталған есектер Мойынқұм ауданының Ұланбел ауылы жақтағы жайылымдарға айдала бастады. Қазір қораларда ұзақ қашықтыққа шыдай алмайтын 10-15 бас қана жануар қалды», – деп нақтылады әкімдік өкілдері.

Сонымен бірге Темірбек ауылдық округінің әкімдігіне аумақтың санитариялық жағдайын тексеріп, тиісті актіні ұсыну тапсырылды.

Айта кетейік, Жамбыл облысында мал ауруларының 10 дерегі анықталды.