Жаңа Hyundai Elantra 2027 жылы таныстырылады

Жаңа Hyundai Elantra 2027 жылы таныстырылады: жасанды интеллект пен гибридті технологияға басымдық берілген. 

Кореялық Hyundai компаниясы танымал Elantra седанының жаңа буынын таныстыруға дайындалып жатыр. The Korean Car Blog басылымының мәліметінше, сегізінші буындағы модель толықтай жаңартылған дизайнмен, кеңейтілген цифрлық мүмкіндіктермен және жаңа гибридті технологиялармен жабдықталады.

Алдын ала жарияланған рендерлер мен тыңшылық фотосуреттерге қарағанда, жаңа Elantra сыртқы келбеті жағынан бұрынғыдан әлдеқайда заманауи әрі премиум сипатқа ие болады. Автокөліктің алдыңғы бөлігі жаңартылған радиатор торымен ерекшеленсе, бүйірлік силуэті Hyundai компаниясының флагмандық Grandeur моделін еске салады.

Көліктің артқы бөлігінде 3D-эффект беретін жаңа шамдар орнатылған. Бұл шешім седанның сыртқы келбетін айшықтап қана қоймай, оны визуалды тұрғыдан кеңірек көрсетеді.

Жаңа буындағы Elantra интерьерінде де елеулі өзгерістер күтіледі. Негізгі жаңалықтардың бірі – 17 дюймдік орталық дисплей. Автокөліктің көптеген функциялары, соның ішінде климаттық бақылау жүйесі де осы экран арқылы басқарылмақ.

Сонымен қатар жүргізушіге арналған 9,9 дюймдік цифрлық аспаптар панелі орнатылады. Компания дәстүрлі батырмаларды барынша азайтып, интерьерді ықшам әрі технологиялық бағытта жаңартуды көздеп отыр. Сондай-ақ жаңа рөл мен Grandeur стилінде жасалған алдыңғы панель қолданылуы мүмкін.

Седанның басты ерекшеліктерінің бірі – жасанды интеллект негізіндегі жаңа басқару жүйесі болмақ. Elantra Hyundai компаниясының Android платформасына негізделген Pleos операциялық жүйесімен жабдықталған алғашқы модельдерінің қатарына енеді.

Жүйеге енгізілетін Gleo атты дауыстық көмекші күрделі командаларды түсініп, бірнеше тапсырманы қатар орындай алады. Бұл жүргізушіге мультимедиа, навигация және көлік функцияларын қолмен басқармай-ақ пайдалануға мүмкіндік береді.

Техникалық жағынан жаңа Elantra TMED-II буынындағы гибридті күштік қондырғымен жабдықталады. Өндірушінің мәліметінше, бұл жүйе отын шығынын азайтып, қозғалтқыш жұмысының тиімділігін арттырады. Hyundai соңғы жылдары гибридті технологияларды дамытуға басымдық беріп келеді және жаңа Elantra бұл бағыттағы негізгі модельдердің біріне айналмақ.

Жаңа буындағы Hyundai Elantra-ның ресми тұсаукесері 2026 жылғы 26 маусымда Оңтүстік Кореяда өтетін Busan Mobility Show халықаралық көрмесінде өтеді деп күтілуде. Осыдан кейін компания ішкі нарықта алдын ала тапсырыс қабылдауды бастайды.

Ал Солтүстік Америка нарығында жаңа модельдің сатылымы 2027 жылдың алғашқы жартысында басталуы мүмкін.

Айта кетейік, бұған дейін Hyundai Auto Kazakhstan компаниясы Қазақстандағы 388 дана Tucson NX4 FL моделіне қатысты сервистік науқан жариялаған болатын. Оның аясында көліктердің қауіпсіздік жүйесіне жауап беретін бағдарламалық жасақтама тегін жаңартылады.