Жаңа мұнай зауыты: жоба құны 10 млрд долларға бағаланды

Энергетика вице-министрі Қайырхан Тұтқышбаев төртінші мұнай өңдеу зауытын салу мүмкіндігі белсенді талқыланып жатқанын мәлімдеді.
Оның айтуынша, алдын ала жоспар бойынша жаңа кәсіпорын жылына шамамен 10 млн тонна мұнай өңдейді, ал жобаның болжамды құны 10 млрд АҚШ долларын құрауы мүмкін.

Вице-министрдің сөзінше, зауыт іске қосылған жағдайда елдегі дизель мен авиаотын тапшылығы толық жабылып, артық өнім экспортқа шығарылмақ.

Сондай-ақ ол 2025 жылдың қорытындысы бойынша Қазақстандағы үш зауытта өндірілетін әуе отыны 750-760 мың тоннаға жуықтайтынын, бұл ішкі сұраныстың бір бөлігін ғана қамтитынын айтты. Қазіргі жалпы тұтыну көлемі 1,2 млн тонна, ал 500-600 мың тонна авиаотын сырттан импортталады.

Импортталған отын негізінен халықаралық әуе тасымалдаушылары мен әуежайлардың қажеттілігіне бағытталады. Бұл ретте ең көп тұтынушы ретінде Алматы халықаралық әуежайы аталды.